Túrkııadaǵy orman órti: 17 adam qamaýǵa alyndy

ASTANA. KAZINFORM - 15 kún ishinde Túrkııanyń ártúrli aımaqtarynda orman órtine qatysy bar 17 adam qamaýǵa alyndy. Bul týraly Túrkııanyń Ádilet mınıstri Iylmaz Týnch málimdedi, dep habarlaıdy AZERTADJ.

Mınıstr otandastaryn eldiń orman alqaptaryn qorǵaýǵa shaqyrdy jáne ony «Jasyl Otan» dep atady. Sonymen qatar Túrkııa vıtse-prezıdenti Djevdet Iylmaz klımattyń ózgerý saldarymen kúrestiń tıimdiligin arttyrý mindetin kózdeıtin táýekelderdi basqarý ortalyǵyn qurý týraly jarııalady.

Túrik bıliginiń málimetinshe, órt sóndirýshiler men eriktiler 25 shildede 73 orman órtimen kúresken, olardyń basym kópshiligi adamnyń kinásinen bolǵan.

Habarlanǵandaı, Túrkııada juma kúni 25 shildede jańa temperatýra rekordy tirkeldi.

Eskıshehır provıntsııasynda dala órtin sóndirý kezinde qaza tapqan 10 adamnyń máıiti DNQ saraptamasy úshin Ankaraǵa ákelingen.

Shilde aıynyń basynda Túrkııanyń orman alqaptary men aýylsharýashylyq aımaqtarynda 260-tan astam órt boldy.

Órt eldiń batysyndaǵy birqatar provıntsııada, atap aıtqanda Izmırde tirkeldi. Aýmaqty tútin basyp, órt sóndirý avıatsııasynyń jumysy kezinde halyqaralyq áýejaı ýaqytsha jabyldy.

Ońtústik Mersın jáne Hataı provıntsııalarynyń ormandarynda, sondaı-aq Antalıa men Mýgla kýrorttyq provıntsııalarynda órt tirkeldi.

Aıta keteıik, Túrkııada buryn-sońdy bolmaǵan aptap: termometr baǵany 50 gradýstan asty.