Túrkııadaǵy narazylyq kezinde zardap shekken qazaqstandyqtar joq – SІM

ASTANA. KAZINFORM – Qazaqstannyń Túrkııadaǵy elshiligi narazylyqqa baılanysty qazaqstandyqtarǵa úndeý jasaǵan bolatyn.

— Eń bastysy — zardap shekkender joq. Bul Syrtqy ister mınıstrliginiń, bas konsýldyqtyń jáne Ankaradaǵy elshiligimizdiń belsendi jumysynyń nátıjesi. Bizdiń Ystambul, Izmır jáne Antalııa qalalarynda bas konsýldyqtar bar. Narazylyq bastalǵan sátten proaktıvti jumys júrgizdik. Biz azamattarymyzdy, ásirese stýdentter men týrısterdi birden eskertip, jappaı jınalatyn jáne narazylyq ótetin oryndarda bolmaýǵa shaqyrdyq, — dedi Syrtqy ister mınıstriniń birinshi orynbasary Aqan Rahmetýllın Májilis otyrysynan keıin ótken baspasóz máslıhatynda.

Degenmen mınıstrdiń orynbasary Túrkııada qansha Qazaqstan azamaty baryn naqty ataı almady.

— Dál qansha azamatymyzdyń sol jerde ekenin naqty aıta almaımyn. Óıtkeni, birneshe sanattaǵy azamattarymyz bar, ıaǵnı stýdentter, týrıster jáne konsýldyq esepte turǵandar. Árıne, saqtyq sharalaryn ustaný qajet. Biraq, dál qazir múlde barýǵa bolmaıdy dep aıtpas edim, jeke pikirim kúte turar edim, — dep tolyqtyrdy Aqan Rahmetýllın.

Aıta ketsek, Túrkııada 19 naýryzdan beri jalǵasyp jatqan narazylyqtar kezinde 1 133 adam ustaldy. 

Buǵan deıin Ystambul meri Ekrem Imamoǵlý ustalǵany týraly habarlanǵan bolatyn. Ol jemqorlyq jáne terrorlyq uıymdardy qoldaý aıyptary boıynsha tergelip jatyr. 

Osy oqıǵadan keıin Túrkııanyń ulttyq valıýtasy — lıra qunsyzdanyp, tarıhı mınımýmǵa jetti. 

Ystambulda barlyq mıtıngiler men sherýlerge tyıym salynǵanyna qaramastan, narazylyqtar eldiń birneshe provıntsııasynda jalǵasyp jatyr. 

23 naýryzda Ekrem Imamoǵlý Túrkııa prezıdenttigine kandıdat retinde usynyldy.