Túrkııadaǵy munaı óńdeý zaýytynda jarylys boldy

ASTANA.  KAZINFORM – Túrkııanyń Izmıtte ornalasqan eń iri munaı óńdeý zaýyty TÜPRAŞ-da kúshti jarylys boldy, dep habarlaıdy Kazinform menshikti  tilshisi.

Kodjaelı qalalyq mýnıtsıpalıtetiniń meri Tahır Bıýıýkakynnyń málimdeýinshe, jarylys josparlanǵan jattyǵý kezinde bolǵan. Oqıǵa saldarynan zardap shekkender joq. Jarylystan keıin zaýyt aýmaǵynan órt shyqty. Bılik málimetinshe, ol tez arada aýyzdyqtalyp, baqylaýǵa alyndy.

Qazirgi kezde zaýyt mamandary men qaýipsizdik qyzmeti bolashaqta mundaı oqıǵalardyń aldyn alý úshin jarylystyń naqty sebebin anyqtap jatyr. Zaýyttaǵy jaǵdaı qalypqa keltirildi, kásiporyn jumysy shtattyq rejımde jalǵasady.

Eske salsaq, 22 qazanda Túrkııanyń Kodjaelı provıntsııasynda ornalasqan Gebze qalasyndaǵy turǵyn úılerdiń birinde tabıǵı gaz jaryldy. Oqıǵa saldarynan jeti adam zardap shekti, olardyń úsheýiniń jaǵdaıy aýyr.

Jarylys ǵımaratqa aıtarlyqtaı zııan keltirdi, úıdiń bir bóligi tolyq derlik qırap qalǵan.