Túrkııadaǵy metallýrgııa zaýytyndaǵy jarylystan qaza tapqandar sany artty
ASTANA. KAZINFORM – Túrkııanyń batysyndaǵy Izmır provıntsııasynyń Alıaga qalasynda ornalasqan Habaş metallýrgııa zaýytynda bolǵan qýatty jarylys saldarynan qaza tapqandar sany 17 adamǵa jetti, dep habarlaıdy Euronews.
Jarylys 9 qarasha, dúısenbi kúni jergilikti ýaqyt boıynsha saǵat 11:46-da bolǵan. Oqıǵadan keıin zaýyt aýmaǵynda órt shyǵyp, óndiristik keshen ústin qoıý tútin basqan. Áýeden túsirilgen kadrlarda nysandy arnaıy tehnıkanyń qorshaýǵa alǵany, al jedel járdem kólikteriniń zardap shekkenderdi jaqyn mańdaǵy aýrýhanalarǵa jetkizip jatqany kórinedi.
Izmır gýbernatory Súleıman Elbannyń aıtýynsha, jóndeý jumystary kezinde kópirli kran elektr doǵaly peshtiń ústine qulap, gaz qubyryn zaqymdaǵan. Sonyń saldarynan jarylys bolǵan.
Jumysshylardyń biri AFP agenttigine krannyń úzilgen arqanynan shamamen 120 tonna balqyǵan bolat peshke tógilip, qýatty reaktsııa týyndaǵanyn aıtqan.
Oqıǵa kezinde zaýyttyń zardap shekken bóliginde shamamen 200 qyzmetker bolǵan. Ádette jumysshylar sany budan kóp bolady. Alaıda tehnıkalyq qyzmet kórsetýge baılanysty óndiris ýaqytsha toqtatylǵan.
Apattyń mán-jaıyn tergeý úshin tórt prokýror taǵaıyndaldy. Bes adam ustaldy. Qutqarýshylar úıindi astynda qalǵan adamdardy izdestirý jumystaryn jalǵastyryp jatyr.
Eske sala ketsek, buǵan deıin Túrkııanyń Izmır provıntsııasyndaǵy HABAŞ metallýrgııa zaýytynda bolǵan jarylystan 10 jumysshy qaza taýyp, taǵy 15 adam jaraqat alǵanyn jazdyq.
