Túrkııadaǵy lańkestikke qarsy bólimsheler uıymdasqan qylmystyq toptarmen kúresý úshin paıdalanylady
ASTANA. KAZINFORM — Túrkııa uıymdasqan qylmystyń jańa túrlerimen kúresý úshin terrorızmge qarsy bólimshelerdi ornalastyrýdy josparlap otyr, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń ishki ister mınıstri Mustafa Chıftchı málimdegendeı, lańkestikke qarsy bólimsheler endi uıymdasqan qylmystyq toptardyń «jańa býyndarymen» kúresýge qatysady.
Mınıstrdiń aıtýynsha, mundaı toptar áleýmettik jelilerdi belsendi paıdalanýymen jáne jas músheleriniń kóptigimen erekshelenedi. Olar balalar men jasóspirimderge aqsha, mártebe, tanymaldyq jáne belgili bir topqa tıesililik sezimin usyný arqyly tartyp otyr.
Chıftchı atap ótkendeı, qylmystyq toptardyń jastardy tartý jáne qoǵamdyq qorqynysh týdyrý úshin qoldanatyn ádisteri keıbir jaǵynan terrorıstik uıymdardyń ádisterine uqsas. Bul rette ol bul qurylymdardyń maqsattary men zańdy mártebesi ártúrli ekenin atap ótti.
Mınıstrdiń pikirinshe, terrorızmge qarsy kúres bólimsheleri uıymdasqan qylmystyq toptardyń qyzmetin taldaý jáne buzý tájirıbesine ıe, olar endi jańa qylmystyq jelilerge qarsy qoldanylatyn bolady. Bılik sonymen qatar ártúrli kúshtik qurylymdardyń jumysyn tyǵyz úılestirýdi kózdep otyr.
— Eger qylmystyń qurylymy ózgerse, onymen kúresý ádisteri de ózgerýi kerek, — dep atap ótti Chıftchı.
Mınıstr 2026 jyl Túrkııada mundaı toptarmen kúresý úshin arnaıy jyl bolyp jarııalanǵanyn eske saldy. Bıylǵy jyldyń alǵashqy jeti aıynda quqyq qorǵaý organdary 518 qylmystyq topqa qarsy 1445 operatsııa júrgizdi. Nátıjesinde qylmystyq top múshesi degen kúdikke ilingen 6320 adam ustaldy.
Eske salsaq, osyǵan deıin Túrkııada qylmystyq toptardy nasıhattaıtyn materıaldardy taratty, sondaı-aq áleýmettik jeliler men jedel habar almasý qosymshalary arqyly adamdardy tartýǵa áreket jasady degen kúdikpen 52 provıntsııada bir ýaqytta júrgizilgen aýqymdy arnaıy operatsııa kezinde 216 adam ustaldy.
