Túrkııadaǵy qonaqúıler órt qaýipsizdigi boıynsha qorytyndy ala almaı jatyr
ASTANA. KAZINFORM — Túrkııadaǵy qonaqúıler úshin órt qaýipsizdigi qorytyndylaryn tapsyrý merzimi mamyr aıynyń sońynda aıaqtalady. Alaıda kóptegen nysan tekseristen ýaqytynda óte almaı otyr, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń ekonomimanşet basylymynyń jazýynsha, týrıstik salada belgilengen merzimniń jaqyndaýyna baılanysty alańdaýshylyq kúsheıip keledi. Bıyl jyl basynda engizilgen jańa talaptarǵa sáıkes, barlyq adam ornalastyratyn oryndar mamyrdyń sońyna deıin órt qaýipsizdigi normalaryna sáıkestigin rastaýy tıis. Áıtpese olardyń lıtsenzııalary kúshin joıýy múmkin.
Baqylaýdy kúsheıtýge 2025 jyldyń aqpanynda Kartalkaıa taý shańǵysy kýrortynda bolǵan qaıǵyly oqıǵa sebep boldy. Osydan keıin qonaqúılerdegi qaýipsizdik máselesine erekshe nazar aýdarylyp, jańa erejeler engizildi. Endi barlyq nysandar órt qyzmetiniń resmı qorytyndysyn alýy mindetti.
Alaıda bul talaptardy oryndaý is júzinde qıyndyq týdyryp otyr. Ásirese Ystanbulda ótinishterdiń kóptiginen qonaqúıler tekseriske ýaqytynda jazyla almaı jatyr. Kezek sozylyp, keıbir nysandarǵa tekseris kúnderi 31 mamyrdan keıin de berilip jatqan kórinedi.
Sala ókilderi qazirgi jaǵdaı saqtalsa, kóptegen qonaqúıler jabylý qaýpine tap bolýy múmkin ekenin aıtyp otyr.
Máseleni sheshý úshin bıznes ókilderi ymyraly jol usyndy: belgilengen merzimge deıin ótinish bergen, biraq kezekke baılanysty tekseristen óte almaǵan qonaqúılerge ýaqytsha jumys isteýge ruqsat berý. Olardyń pikirinshe, mundaı nysandar tekseris ótkenge deıin lıtsenzııasyn saqtaýy tıis.
Soǵan qaramastan eldegi týrıstik sektor ósimin jalǵastyryp otyr. Qańtar aıynda ǵana Ystanbul 1,3 mıllıonnan astam sheteldik týrıst qabyldaǵan, al jyl sońyna deıin ondaǵan jańa qonaqúı ashylyp, nómirlik qor ulǵaıady dep kútiledi.
Buǵan deıin Túrkııada qonaqúıge tirkelý protsesine qoıylatyn jańa talaptar resmı túrde 2025 jylǵy 11 jeltoqsanda kúshine engenin jazdyq
