Túrkııadaǵy qonaqúıde bolǵan órtten qaza tapqandar sany 79 adamǵa jetti

ASTANA. KAZINFORM — Túrkııanyń Bolý provıntsııasyndaǵy Kartalkaıa taý shańǵysy kýrortyndaǵy qonaqúıdegi órtten qaza tapqandar sany 79 adamǵa jetti, dep habarlaıdy Kazinform menshikti tilshisi.

Aımaqtyq prokýratýranyń málimetinshe, DNQ saraptamasynan keıin qaza bolǵan taǵy birneshe adamnyń tulǵasy anyqtaldy.

Bastapqyda 76 adam qaza taýyp, 50-den astam adam jaraqat alǵany habarlanǵan. Alaıda qurbandardyń jeke basyn anyqtaý jumystary aıaqtalǵannan keıin túrik bıligi jańartylǵan derekterdi rastady. 

Órt seısenbige qaraǵan túni shyǵyp, qonaqúı qonaqtary turǵan ǵımaratty sharpyǵan. Olardyń kópshiligi joǵary qabattan arqan retinde baılanǵan tósek-oryn jabdyǵyn paıdalanyp túsýge tyrysty.

Qaıǵyly oqıǵanyń sebepterin tergeý aıasynda 11 adam ustaldy, olardyǵń arasynda Bolý qalasy meriniń orynbasary, órtke qarsy qyzmet bastyǵynyń orynbasary jáne qonaqúı ıesi bar. 

Túrkııanyń Týrızm jáne mádenıet mınıstri Mehmet Nýrı Ersoı buǵan deıin qonaqúıdiń turaqty tekseristen ótkenin jáne órt qaýipsizdigin buzý faktileri anyqtalmaǵanyn málimdegen. Olaı bolǵanymen, tergeý amaldary jalǵasyp otyr. 

Buǵan deıin Túrkııa prezıdenti Rejep Taıyp Erdoǵan Bolý qalasyndaǵy Kartalkaıa taý-shańǵysy kýrortynda órtten qaza tapqan Gıýltekın otbasyn jerleý rásimine qatysqanyn jazǵan bolatynbyz. 

Eske salsaq, Memleket basshysy Túrkııa Prezıdentine kóńil aıtý jedelhatyn joldady. 

Sonymen qatar, Memleket basshysy Qazaqstan halqynyń jáne óziniń atynan Túrkııa Prezıdenti Rejep Taıyp Erdoǵan men jaqyndarynan aıyrylǵan otbasylarǵa, sondaı-aq baýyrlas túrik halqyna kóńil aıtyp, zardap shekkenderdiń tez arada saýyǵyp ketýine tilektestik bildirdi.