Túrkııadaǵy Qazaqstannyń saılaý ýchaskelerinde referendým aıaqtaldy
ANKARA. KAZINFORM - Túrkııada Qazaqstan Respýblıkasynyń jańa Konstıtýtsııasy boıynsha ótken referendýmdaǵy daýys berý aıaqtaldy, dep habarlaıdy Kazinform agenttiginiń Ankara qalasyndaǵy menshikti tilshisi.
Qazaqstannyń dıplomatııalyq ókildikteri janynan ashylǵan saılaý ýchaskeleri jergilikti ýaqyt boıynsha saǵat 20:00-de jabyldy.
Túrkııa aýmaǵynda barlyǵy tórt saılaý ýchaskesi — №450, №419, №460 jáne №512 jumys istedi. Olar tańǵy 07:00-den bastap azamattardy qabyldady. Kúni boıy elde turatyn nemese ýaqytsha júrgen qazaqstandyqtardyń belsendiligi joǵary boldy.
Daýys berýge stýdentter, kásipkerler, týrıster, sondaı-aq dıplomatııalyq mıssııalar men halyqaralyq uıymdardyń ókilderi qatysyp, azamattyq ustanymyn bildirdi.
Qazaqstannyń Túrkııadaǵy elshiliginiń málimetinshe, el aýmaǵynda referendýmǵa qatysatyn 3 600-den astam Qazaqstan azamaty tirkelgen.
Qazaqstannyń Túrkııadaǵy elshiligi janyndaǵy referendýmnyń ýchaskelik komıssııasynyń tóraǵasy Asqar Tólepbergenıniń aıtýynsha, Ankara ýaqyty boıynsha saǵat 20:00-degi jaǵdaıǵa sáıkes 1 222 adam daýys bergen. Osylaısha jalpy qatysý kórsetkishi 100 paıyzdy qurady.
— Túrkııa aýmaǵyndaǵy saılaýshylardyń qorytyndy qatysý deńgeıi 100 paıyz boldy. Ankaradaǵy saılaý ýchaskesinde 1 222 saılaýshy tirkelgen, — dedi A.Tólepbergen.
Ýchaskeler jabylǵannan keıin komıssııa músheleri daýystardy sanaýǵa kiristi.
Saılaý komıssııalary barlyq tórt ýchaskede daýys berýge qajetti jaǵdaı jasalǵanyn atap ótti.
Referendýmdy uıymdastyrý jumystaryna buǵan deıin osyndaı sharalardy ótkizýde tájirıbesi bar Qazaqstannyń syrtqy saıası vedomstvosynyń qyzmetkerleri tartylǵan.
Buǵan deıin Túrkııada jańa Konstıtýtsııa boıynsha referendýmǵa qatysqan Qazaqstan azamattarynyń belsendiligi joǵary ekeni habarlanǵan bolatyn.
Osyǵan deıin Túrkııanyń Ankara, Ystanbul, Antalııa jáne Izmır qalalaryndaǵy tórt saılaý ýchaskesinde Qazaqstannyń jańa Konstıtýtsııasyna daýys berý júrip jatqany týraly jazdyq.
