Túrkııadaǵy qaıǵyly oqıǵadan keıin órt sóndirý qurylǵylarynyń baǵasy kóterildi

ASTANA. KAZINFORM — Bolýdaǵy Kartalkaıa taý-shańǵysy kýrortyndaǵy Grand Kartal qonaqúıinde bolǵan iri órtten keıin Túrkııada órt sóndirý qurylǵylaryna suranys 300 paıyzǵa artty, dep habarlaıdy Kazinform menshikti tilshisi.

Belgili bolǵandaı, 78 adamnyń ómirin qıǵan qonaqúıdegi órt oqıǵasy búkil Túrkııa men basqa elderdi eseńgiretip, órt qaýipsizdigi máselelerine nazar aýdartty. 

El bıligi memlekettik jáne jekemenshik nysandardyń órt qaýipsizdigi normalarynyń saqtalýyn tekserýdi kúsheıtti. Jyl basynan beri Túrkııada barlyq kásiporyn qyzmetkerlerge órt qaýipsizdigi boıynsha júıeli túrde oqytýdy talap etetin ereje kúshine endi.

Sonymen birge, Bolýdaǵy oqıǵadan keıin órt qaýipsizdigi boıynsha oqytýmen aınalysatyn kompanııalarǵa jańa zań talaptaryn oryndaýǵa jáne yqtımal qaıǵyly oqıǵalardyń aldyn alýǵa tyrysatyn kásipkerlerdiń ótinishteri kóp tústi. Órt sóndirgishter sııaqty órt sóndirý quraldaryna suranys ta kúrt ósti. Jaqsy paıda alý úshin keıbir kásiporyndar bul ónimderdiń baǵasyn aıtarlyqtaı ósirdi.

Osy arada Túrkııanyń Saýda mınıstrligi órt sóndirý quraldaryn satatyn jetkizýshilerdi tekserýdi kúsheıtti. Qazirdiń ózinde joǵary baǵa qoıǵan kásiporyndarǵa tıisti jazalaý sharalary qolǵa alynyp jatyr. 

Belgili bolǵandaı, Túrkııa naryǵynda satylatyn órt sóndirgishterdiń 90 paıyzy — 6 kelilik modelder. Olardyń ortasha baǵasy 900-den 1100 túrik lırasyna deıin (shamamen 12000-15400 teńge) aralyǵynda. Úlkenirek sóndirgishterdiń baǵasy 2000-8000 lıra (28 000-112 000 teńge) aralyǵynda. Sarapshylardyń aıtýynsha, bul óte qymbat.

Sonymen qatar, basqa da órt sóndirý quraldary, sonyń ishinde órt dabylynyń júıeleri, ártúrli tehnıkalyq quraldar men apattyq shyǵý joldarynyń satylymy da kúrt ósti. Kóptegen kásiporyndar óz ǵımarattaryn shuǵyl túrde qajetti qural-jabdyqtarmen jabdyqtaýdy bastady, bul osy klastaǵy taýarlardyń ózindik qunynyń aıqyn ósýin týdyrdy.

Bolýdaǵy qaıǵyly oqıǵa túrik qoǵamy men bıznes qaýymdastyǵyn qaýipsizdikke degen kózqarasyn qaıta qaraýǵa ıtermelegen mańyzdy sabaq boldy. Adamdar ómirdi órtten qorǵaý úshin belsendi sharalardy qoldana bastady.

Eske salsaq, Túrkııanyń Bolý provıntsııasyndaǵy Kartalkaıa taý-shańǵysy kýrortynda bolǵan jantúrshigerlik órt boldy. Saldarynan 79 adam qaza tapty. 

Keıinnen Túrkııa Bolý tragedııasynan keıin aza tutý kúnin jarııalady.