Túrkııadaǵy Qara teńizden jańa gaz ken orny tabyldy

ASTANA. KAZINFORM — Sońǵy jyldardaǵy mańyzdy energetıkalyq jańalyqtardyń birin Túrkııa jarııa etti, dep habarlady Kazinform agenttiginiń menshikti tilshisi.

Túrkııanyń Energetıka jáne tabıǵı resýrstar mınıstrliginiń málimetinshe, Sakarıa gaz ken ornyndaǵy Göktepe-3 ýchaskesinde 49 kúndik burǵylaý jumystarynan keıin tabıǵı gaz qory tabyldy. Jalpy kólemi – 75 mıllıard tekshe metr, bul shamamen 30 mıllıard dollarǵa baǵalanyp otyr.

Aldyn ala esepteýler boıynsha, bul kólem Túrkııanyń ishki suranysyn 3,5 jyl boıy qamtamasyz ete alady. Jańa ken orny eldiń energetıkalyq táýelsizdigin nyǵaıta túsedi jáne Ankaranyń janarmaı ımportyna táýeldilikti azaıtý jónindegi aýqymdy strategııasynyń bir bóligi sanalady.

Túrkııanyń energetıka jáne tabıǵı resýrstar mınıstri Alparslan Baıraktar tabylǵan ken ornyn ıgerý jumystary jedeldetiletinin, óndiristik aýqymdaǵy gaz óndirýdi múmkindiginshe tez bastaý kózdelip otyrǵanyn málimdedi. Jańa ken orny energııa tasymaldaýshylaryn ımporttaýǵa jumsalatyn shyǵyndy edáýir azaıtyp, Túrkııanyń aımaqtaǵy energetıkalyq oıynshy retindegi ornyn kúsheıtedi dep kútiledi. 

Baıraktardyń aıtýynsha, Göktepe-3-tegi gaz qorynyń tabylýy Qara teńiz qaırańynyń bolashaǵy zor ekenin jáne Túrkııanyń energetıkalyq ınfraqurylymdy damytýdaǵy jetistikterin taǵy bir márte dáleldeıdi.

Buǵan deıin biz Túrkııanyń jańa Ygdyr–Nahchyvan gaz qubyry arqyly Ázerbaıjanǵa gaz jetkizýdi resmı túrde bastaǵanyn habarlaǵan bolatynbyz. Kógildir otyn osy jańa baǵytpen tasymaldanatyn bolady.