Túrkııadaǵy ınflıatsııa 33,5%-ǵa deıin baıaýlady

ASTANA. KAZINFORM – Túrkııanyń Statıstıka ınstıtýty (TÜİK) 2025 jyldyń shildesine arnalǵan ınflıatsııa boıynsha oń derekterdi jarııalady. Alaıda ázirge ornyqty dezınflıatsııa baıqalmaı otyr, dep habarlaıdy Kazinform agenttiginiń menshikti tilshisi. 

Resmı statıstıkaǵa sáıkes, bıylǵy shilde aıynda tutyný baǵalarynyń ósimi 2,06% boldy, bul maýsymdaǵy (1,64%) kórsetkishten joǵary. Osy aılyq jedeldeýge qaramastan, jyldyq ınflıatsııa deńgeıi tómendeýdi jalǵastyrýda – maýsymdaǵy 35,05%-dan shildede 33,52%-ǵa deıin túsken.

Jyldyq ınflıatsııanyń mundaı tómendeýi byltyrǵy joǵary baza áseri men maýsymdyq aýytqýlarǵa baılanysty. Alaıda sarapshylar baǵanyń turaqtanýy týraly aıtýǵa áli erte ekenin eskertedi. Tehnıkalyq baıaýlaý bolǵanymen, negizgi taýarlar men qyzmetterdiń baǵasy ósip jatyr, al ınflıatsııalyq kútýler joǵary kúıinde qalyp otyr.

Shilde aıynda baǵanyń ósýine negizgi sebep bolǵan faktorlar – azyq-túlik, turǵyn úı jaldaýy jáne qyzmetter salasy. Ekonomısterdiń aıtýynsha, aqsha-nesıe saıasatynyń áreketine qaramastan, ınflıatsııalyq qysym áli de kúshti. Álsiz lıra, ımportqa joǵary táýeldilik jáne syrtqy naryqtardaǵy belgisizdik jaǵdaıynda Túrkııa ornyqty dezınflıatsııa jolynda qıyndyqtarǵa tap bolyp otyr.

Eldiń Ortalyq banki buǵan deıin ınflıatsııany orta merzimdi perspektıvada bir tańbaly kórsetkishke deıin tómendetý maqsatyn belgilegen edi, alaıda qazirgi úrdis bul maqsatqa jetý ońaı bolmaıtynyn jáne aqsha-nesıe saıasatynda da, ekonomıkanyń qurylymdyq reformalarynda da batyl qadamdardy talap etetinin kórsetip otyr.

Jyldyq ınflıatsııa deńgeıiniń tómendeýi sózsiz oń belgi bolǵanymen, onyń artynda eleýli qaýipter jasyrynǵan. Áli de saqtalyp otyrǵan joǵary ınflıatsııa halyqtyń satyp alý qabiletin álsiretip, bıznes úshin qosymsha qıyndyqtar týǵyzyp otyr.

Buǵan deıin Túrkııada joǵary bilim jumysqa ornalasýǵa kepil bolýdan qalyp bara jatqany týraly habarlaǵan bolatynbyz.