Túrkııadaǵy Grand Kartal qonaqúıindegi órttiń negizgi sebebi anyqtaldy

ASTANA. KAZINFORM – Bıylǵy jyldyń 21 qańtarynda Túrkııanyń Kartalkaıa taý shańǵysy kýrortynda ornalasqan Grand Kartal qonaqúıinde úlken órt shyqqan edi. Kazinform agenttiginiń menshikti tilshisi habarlaǵandaı, kóptegen adamnyń qaza tabýyna personaldyń áreketteri sebep boldy — olar óz qatelikterimen órttiń taralýyna jol bergen.

Belgili bolǵandaı, órttiń kesirinen 78 adam qaza tapty, olardyń keminde 20-sy – balalar. Sonymen qatar, 51 adam túrli dárejedegi jaraqat aldy. Órt túnniń bir ýaǵynda, qonaqúıdiń meıramhanasy ornalasqan qabattardyń birinde bastalǵan. Alaıda órt dabyly júıesi jumys istemeı, qonaqtar der kezinde qaýip jaıly eskertilmegen.

Tergeý nátıjesinde órttiń meıramhanadaǵy qurylǵynyń uzaq ýaqyt qyzyp ketýinen bastalyp, onyń ústinde bolǵan maıdyń kenetten tutanýy sebep bolǵany anyqtaldy.

Sonymen qatar, ýákiletti organnyń sońǵy saraptamalyq esebi alǵashqy órt týraly aqparat qonaqúı ákimshiligine dereý jetkenin kórsetti. Alaıda, adamdardy evakýatsııalaýdyń ornyna qyzmetkerler jerasty turaqtaǵy kólikterdi qutqarýǵa tyrysqan. Órt bastalǵan alǵashqy 12 sheshýshi mınýt ishinde qonaqtardyń eshbiri oıatylmaǵan.

Qyzmetkerler turaq qaqpalaryn qolmen ashqan, bul otteginiń ishke kóptep enýine jáne órttiń qatty kúsheıýine ákelip soqqan. Jarylys jeldetkish shahtalar arqyly tez taralyp, jaǵdaıdy odan ári ýshyqtyrǵan.

Tergeý barysynda evakýatsııalyq shyǵý joldarynyń jabyq bolǵany jáne dabyl júıesiniń sóndirilgeni anyqtaldy. Osy derekter negizinde 31 adam, sonyń ishinde qonaqúı ıesi, dırektory jáne jergilikti sheneýnikter ustaldy. Qazirgi ýaqytta 22 adam qamaýda otyr.

Eske sala keteıik, buǵan deıin qonaqúıdegi órtte bir otbasynan 14 adam qaza taýyp, Erdoǵan kóńil aıtqanyn jazǵan bolatynbyz.

Buǵan deıin biz órtengen qonaqúıdiń ıesi bolǵan jaǵdaıǵa personaldy kinálaǵany týraly habarlaǵan edik.

Jaqynda Túrkııanyń Býrsa provıntsııasyndaǵy Ýlýdal aımaǵynda taǵy bir qonaqúıde órt bolyp, eki adamnyń ólimine sebep boldy.