Túrkııadaǵy esirtki isi: tanymal on adamnyń jeteýinde test qorytyndysy esirtki bar ekenin kórsetti
ASTANA. KAZINFORM — Test qorytyndysy jeti adam, sonyń ishinde túriktiń tanymal modeli Dıdem Soıdannyń qan quramynda esirtkiniń bar ekenin kórsetti, dep habarlaıdy Kazinform agenttiginiń Ankaradaǵy menshikti tilshisi.
Túrkııada Ystanbul prokýratýrasy bastaǵan tyıym salynǵan zattardy paıdalaný jáne taratý boıynsha tergeý jalǵasyp otyr.
Tergeý is-sharalary aıasynda eldegi on kórnekti tulǵa Sot medıtsınasy ınstıtýtynda medıtsınalyq tekserýden ótti.
Kúdikke ilingen jeti adamnyń shash, qan jáne zár úlgileri esirtkige oń qorytyndy berdi.
Qorytyndy oń bolǵandar qatarynda Dıdem Soıdan, Onýr Talaı, Ismaıl Berhan Perıncheklı, Mýstafa Tarı, Ferhat Aıdyn, Koraı Serenlı jáne Ozan Gıýmıýsh bar.
Osy arada Kerım Sabandjı, Gıýzıde Dýran Aksoý jáne Onýr Bıýkchıýden alynǵan taldaý qorytyndysy teris boldy. Batýaraı Ozdemırdiń de taldaýy teris nátıje kórsetti, biraq alaıda onyń shashynan depressııa, mazasyzdyq, úreı ustamalary jáne basqa da psıhıkalyq aýrýlardy emdeý úshin keńinen qoldanylatyn antıdepressanttardyń belsendi ıngredıenti — sertralın anyqtalǵan.
Іs boıynsha aıyptalýshylar qatarynda sondaı-aq «Esigimdi qaq» telehıkaıasynyń tanymal aktrısasy Hande Erchel jáne onyń burynǵy jigiti — mıllıoner Hakan Sabandjı, sondaı-aq Fıkret Orman, Kerım Sabandjı, Býrak Elmas, Sezgın Keısýren jáne basqalary bar.
«Múkjıdek sherbeti» hıt telehıkaıasynda Fatıh rólimen tanymal Dogýkan Gıýnger buǵan deıin biraz ýaqytqa qamaýǵa alynǵan bolatyn. Sol kezde eldiń aqsúıek jáne medıa elıtasyna qatysty is boıynsha on toǵyz adam tutqyndaldy.
Osyǵan deıin Ystanbulda esirtkige qarsy operatsııa kezinde tanymal aktrısa Hande Erchel qamalǵanyn habarlaǵan edik.
