Túrkııadaǵy dúrbeleń: «Taǵdyrǵa sen» serıalynyń aktrısasy bosatyldy
ASTANA. KAZINFORM – Ystanbulda esirtki jáne soǵan baılanysty qylmys boıynsha júrgizilip jatqan eki tergeýge qatysty kıno ártisteri, mýzykanttar jáne basqa da tanymal tulǵalardy qosa alǵanda, 21 adam ustaldy. Bul týraly Kazinform agenttiginiń Ankaradaǵy menshikti tilshisi habarlaıdy.
Túrkııanyń Milliyet basylymynyń habarlaýynsha, Ystanbulda elge tanymal tulǵalarǵa qatysty tergeý jalǵasyp jatyr. Esirtkini qoldaný jáne taratý kúdigine, sondaı-aq ózge de birqatar qylmysqa baılanysty eki bólek is qozǵalǵan. Osy ister aıasynda quqyq qorǵaý organdary 24 adamdy tutqyndaýǵa order bergen. Arnaıy operatsııa barysynda olardyń 21-i kúdikti retinde ustaldy.
Olardyń qatarynda akterler Aras Býlýt Iınemlı, Melıs Sezen, Nılperı Shahınkaıa, Melısa Shenolsýn, mýzykant Sefo, burynǵy fýtbolshy Hasan Shash jáne ózge de tanymal tulǵalar bar.
Sot medıtsınasy ınstıtýtyndaǵy medıtsınalyq tekserýden keıin ustalǵandardyń biraz bóligi bosatylsa, Nılperı Shahınkaıa men Hasan Shash sot baqylaýymen bosatyldy.
Bul rette Saıat Zýrnachı men Aıtach Kartty qamaýǵa alý týraly ótinish sotqa joldanyp, sheshim boıynsha ekeýi de qamaýǵa alyndy. Al Mýhammet Kahıaoglýǵa qatysty osyndaı ótinish berilgenimen, ol bosatyldy.
Aras Býlýt Iınemlı, Sefo, Melıs Sezen jáne Melısa Shenolsýndy qosa alǵanda, taǵy on kúdikti tıisti rásimderden keıin bosatyldy.
Bul rette prokýratýra Volkan Akchyraı, Zeınep Akchyraı, Eda Gıýzeldjık, Sezer Chakır, Hazal Fılız Kıýchıýkkese jáne Ielız Týba ıAsaǵa qatysty tergeýdi jalǵastyrdy. Alty kúdiktiniń qamaýda bolý merzimi uzartyldy. Іs boıynsha tergeý jalǵasyp jatyr.
Tergeý aıasynda «Taǵdyrǵa sen» túrik telehıkasynda basty rólderdiń birin somdaǵan aktrısa Afra Sarachoǵlý da ustaldy. Buǵan deıin ony ustaýǵa order berilgen bolatyn. Aktrısa Frantsııadan oralǵan kezde Ystanbul áýejaıynda qolǵa tústi.
Menedjerleriniń málimetinshe, Sarachoǵlý Sot medıtsınasy ınstıtýty men prokýratýrada tıisti rásimderden ótkennen keıin bosatyldy. Buǵan deıin aktrısa áleýmettik jelidegi paraqshasynda jumys saparymen shetelde júrgenin jáne jaýap berý úshin Túrkııaǵa oralatynyn málimdegen.
Sonymen qatar «Kókjaldar mekeni» serıaly Túrkııadaǵy FETO tergeýiniń nazaryna ilikkenin habarlaǵan bolatynbyz.
Aqzat Jıenalına
