Túrkııadaǵy «Akkýıý» AES-i jyl sońyna deıin synaq rejıminde elektr energııasyn óndire bastaıdy
ASTANA. KAZINFORM — Túrkııa bıligi eldegi alǵashqy atom elektr stantsııasy — «Akkýıý» AES-inde bıylǵy jyldyń sońyna deıin synaq rejıminde elektr energııasyn óndirýdi bastaýdy josparlap otyr. Bul týraly Kazinform agenttiginiń Ankaradaǵy menshikti tilshisi habarlady.
Túrkııanyń Energetıka jáne tabıǵı resýrstar mınıstri Alparslan Baıraktardyń aıtýynsha, «Akkýıý» AES-iniń birinshi energoblogynda nysandy paıdalanýǵa berý aldyndaǵy halyqaralyq talaptarǵa sáıkes kózdelgen synaq baǵdarlamasy jalǵasyp jatyr.
Mınıstrdiń málimetinshe, jalpy sany eki myńǵa jýyq synaq júrgizilýi tıis. Qazirgi ýaqytta sonyń shamamen 15–20 paıyzy oryndalǵan. Barlyq synaq jumystary aıaqtalǵannan keıin Túrkııa jyl sońyna deıin stantsııada synaq rejıminde elektr energııasyn óndirýdi bastaýdy kózdep otyr.
«Akkýıý» AES-i — Túrkııa tarıhyndaǵy alǵashqy atom elektr stantsııasy. Joba Reseıdiń qatysýymen júzege asyrylýda. Stantsııa quramyna árqaısysynyń qýaty 1200 megavatt bolatyn, III+ býyndaǵy VVER-1200 reaktorlarymen jabdyqtalǵan tórt energoblok kiredi.
Joba «salý — ıelený — paıdalaný» (Build–Own–Operate) modeli boıynsha iske asyrylýda. Bul úlgige sáıkes, bir kompanııa stantsııany salyp, onyń ıesi bolyp qala beredi ári keıingi paıdalaný jumystaryn da ózi júzege asyrady.
Buǵan deıin Túrkııa tarıhyndaǵy alǵashqy atom elektr stantsııasy — «Akkýıý» AES-iniń birinshi energoblogynyń qurylysy is júzinde tolyq aıaqtalǵany habarlanǵan bolatyn.
Eske sala keteıik, buǵan deıin Túrkııa tarıhyndaǵy alǵashqy atom elektr stantsııasy «Akkýıýdyń» birinshi energetıkalyq blogy aıaqtalýǵa jaqyn.
