Túrkııadaǵy AES qurylysshylary jalaqynyń tólenbeýine baılanysty ereýilge shyqty

ASTANA. KAZINFORM —  Túrkııanyń Mersın provıntsııasynda salynyp jatqan «Akkýıý» atom elektr stantsııasynyń qurylysshylary sársenbi kúni úsh aı boıy jalaqy tólenbeýi men eńbek jaǵdaıynyń nasharlyǵyna narazylyq bildirip, ereýil jarııalady, dep habarlaıdy Turkrus.

Qurylysshylar kásipodaǵy jumysshylardy qoldap, eńbek jaǵdaılaryn jaqsartýǵa shaqyrdy.

AES-ti Reseıdiń memlekettik energetıkalyq kompanııasy «Rosatom» salyp jatyr. Korporatsııa jumysshylarǵa jalaqy keshiktirilgenin rastady jáne muny sanktsııalarmen baılanystyrdy.

— Qazirgi ýaqytta jobanyń úzdiksiz qarjylandyrylýyn qamtamasyz etý maqsatynda týyndaǵan máselelerdi sheshý joldary qarastyrylyp jatyr. Buǵan úshinshi taraptardyń yqpalymen eleýli qarjy kóleminiń buǵattalýy da sebep boldy. Biz túrik tarapymen birlesip, múmkin bolatyn sheshimder izdep, jaǵdaıdy konstrýktıvti arnaǵa qaıtarý úshin jumys júrgizip jatyrmyz, — dep málimdedi kompanııa.

«Akkýıý» — Túrkııada salynyp jatqan alǵashqy atom elektr stantsııasy. Ol Jerorta teńiziniń jaǵalaýynda, «qurylystan paıdalaný kezeńine deıin» (BOO — Build-Own-Operate) úlgisimen «Rosatom» tarapynan júzege asyrylýda. Tórt reaktordan turatyn bul AES Túrkııanyń elektr energııasyna degen qajettiliginiń 10 paıyzyn qamtamasyz etedi dep kútilýde.

Buǵan deıin Túrkııada qarjylyq qıyndyqtar «Akkýıý» AES-niń jańa bloktaryn salý qarqynyn báseńdetkeni týraly jazǵan edik.