Túrkııadaǵy AES alǵashqy elektr energııasyn óndirýge daıyndalyp jatyr
ASTANA. KAZINFORM – Túrkııadaǵy «Akkýıý» atom elektr stantsııasynyń alǵashqy energoblogyn 2026 jyldyń sońyna deıin iske qosý josparlanyp otyr. Bul týraly Kazinform agenttiginiń Ankaradaǵy menshikti tilshisi habarlaıdy.
Túrkııanyń ońtústiginde ornalasqan «Akkýıý» atom elektr stantsııasynyń qurylysy aıaqtalýǵa jaqyn. Mersın provıntsııasyndaǵy qurylys alańyna táýlik boıy shamamen 23 myń adam men 2 myńǵa jýyq tehnıka jumyldyrylǵan. Qýaty 1,2 GVt bolatyn tórt energobloktyń alǵashqysy qazir synaqtan ótip jatyr.
Alǵashqy energoblok iske qosylǵannan keıin, stantsııa Túrkııanyń elektr energııasyna degen qajettiliginiń shamamen 2–2,5%-yn óteı alady. Al tórt energobloktyń barlyǵy jobalyq qýatyna shyqqan kezde, AES jylyna shamamen 35 mlrd kVt·saǵ elektr energııasyn óndiredi. Bul eldegi jalpy elektr tutyný kóleminiń shamamen 10%-yna teń nemese Ystambul sekildi iri megapolıstiń bir jylda tutynatyn elektr energııasymen para-par.
Jobany reseılik «Rosatom» memlekettik korporatsııasy júzege asyryp jatyr. AES qurylysy jónindegi kelisimge 2010 jyly qol qoıylyp, stantsııanyń eseptik paıdalaný merzimi 60 jylǵa eseptelgen. Sondaı-aq bul merzimdi taǵy 20 jylǵa uzartý múmkindigi qarastyrylǵan.
Alǵashqy energoblokpen qatar, qalǵan úsh bloktyń da qurylysy qarqyndy júrip jatyr. Ekinshi blokta mehanıkalyq jumystar bastalsa, úshinshi jáne tórtinshi bloktar kezeń-kezeńimen negizgi qurylys satysyna kóshken.
Jobanyń mańyzdy baǵyttarynyń biri – Túrkııanyń atom energetıkasy salasyndaǵy kásibı áleýetin qalyptastyrý. Túrkııa bıliginiń málimetinshe, jobadaǵy jergilikti óndiristiń úlesi 50%-dan asyp, oǵan 400-den astam túrkııalyq kompanııa tartylǵan. Osy maqsatta Túrkııadan júzdegen maman Reseıdiń joǵary oqý oryndarynda bilim alyp, eldiń atom energetıkasy salasyna qajetti kadrlyq áleýetti qalyptastyryp jatyr.
Túrkııa «Akkýıý» atom stantsııasyn eldegi ıadrolyq energetıkany keń kólemde órkendetýdiń bastamasy dep biledi. Bolashaqta bul memleket taǵy segiz reaktor turǵyzyp qana qoımaı, shaǵyn modýldi reaktorlardyń óz tehnologııalaryn jetildirýdi kózdep otyr.
Tórt energobloktyń barlyǵy tolyq qýatyna shyqqan kezde, «Akkýıý» AES-i jyl saıyn atmosferaǵa shyǵarylatyn kómirqyshqyl gazynyń kólemin shamamen 35 mln tonnaǵa azaıtýǵa múmkindik beredi.
Buǵan deıin Túrkııanyń Energetıka jáne tabıǵı resýrstar mınıstri Alparslan Baıraktar «Akkýıý» AES-iniń birinshi energoblogynda nysandy paıdalanýǵa berý aldyndaǵy halyqaralyq talaptarǵa sáıkes kózdelgen synaq baǵdarlamasy jalǵasyp jatqanyn habarlaǵan edi.
