Túrkııadaǵy 5G abonentteriniń sany 44,5 mıllıonǵa jetti
ASTANA. KAZINFORM - Túrkııada 5G jelisin paıdalanýshylar sany tórt aı ishinde el halqynyń jartysynan asty. Bul týraly agenttiktiń Ankaradaǵy menshikti tilshisi habarlady.
Túrkııada 5G jelisine qosylǵan abonentter sany tórt aıdyń ishinde 44,5 mıllıonǵa jetti. Bul týraly eldiń kólik jáne ınfraqurylym mınıstri Abdulqadyr Ýraloglý málimdedi.
Onyń aıtýynsha, Túrkııada mobıldi 5G jelisin kommertsııalyq maqsatta paıdalaný 1 sáýirde bastalǵan. Jańa tehnologııaǵa alǵashqy kúnniń ózinde shamamen 21 mıllıon qoldanýshy qosylǵan. Qazirgi ýaqytta olardyń sany eki eseden astam ósti.
Mınıstrdiń málimetinshe, búginde el halqynyń jartysynan astamy 5G qyzmetin paıdalanady, ıaǵnı is júzinde árbir ekinshi turǵyn jańa býyn jelisiniń abonenti bolyp otyr.
Ýraloglý 5G tehnologııasynyń damýy Túrkııanyń tsıfrlyq transformatsııasyndaǵy mańyzdy kezeń bolatynyn atap ótti. Onyń aıtýynsha, jańa tehnologııa avtonomdy kólikti engizýge, «aqyldy qalalardy» damytýǵa, ónerkásip kásiporyndaryn avtomattandyrýǵa, sondaı-aq densaýlyq saqtaý, aýyl sharýashylyǵy jáne ekonomıkanyń basqa da salalaryndaǵy júıelerdiń tıimdiligin arttyrýǵa múmkindik beredi.
Eske salaıyq, buǵan deıin Túrkııada 1 sáýirden bastap 5G jelisi kommertsııalyq paıdalanýǵa beriletinin habarlaǵan edik.
Sondaı-aq Ystanbulda 5G jelili alǵashqy «aqyldy jol» iske qosylǵanyn jazǵanbyz.
