Túrkııadaǵy 17 jeke ýnıversıtette medıtsına fakýlteti jabylýy múmkin

ASTANA.KAZINFORM — Túrkııada jekemenshik ýnıversıtetterdegi medıtsınalyq fakýltetterdiń jumysyna qatysty synı jaǵdaı týyndady, dep habarlaıdy Kazinform agenttiginiń menshikti tilshisi.

t24 túrik basylymynyń habarlaýynsha, 17 jekemenshik ýnıversıtettiń medıtsınalyq fakýltetteri óz emhanasynyń bolýy týraly mindetti zań talabyn áli oryndamaǵandyqtan jabylýy múmkin. Múmkindik merzimi osy jyldyń 16 qazanynda aıaqtalady.

Túrkııanyń joǵary bilim týraly zańyna sáıkes, medıtsınalyq fakýltetteri bar barlyq jeke ýnıversıtetter kem degende 200 tósektik óz emhanasyn qurýǵa nemese satyp alýǵa mindetti.

Belgili bolǵandaı, bul ýnıversıtetterge bul talapty oryndaý úshin 2020 jyly bastalyp, osy aptada aıaqtalatyn bes jyldyq merzim berilgen. Jergilikti aqparat quraldarynyń habarlaýynsha, medıtsınalyq fakýltetteri bar jumys istep turǵan 32 jekemenshik ýnıversıtettiń 17-si bul talapty oryndaı almaǵan.

Belgilengen merzimde jańa zańnama nemese keıinge qaldyrý qabyldanbasa, Túrkııa Bilim berý Joǵarǵy Keńesi (YÖK) 17 ýnıversıtettiń medıtsınalyq fakýltetterin jaýyp, stýdentterin basqa oqý oryndaryna aýystyrady.

Jabylatyn fakýltetter tiziminde qazaqstandyq bilim naryǵynda tanymal Ankara Medıpol ýnıversıtetiniń (Ankara Medipol Üniversitesi) Medıtsına fakýlteti bar.

Eske sala keteıik, buǵan deıin Túrkııanyń 100 stýdenti Arızona dıplomyn Qazaqstanda alatynyn jazǵan edik.