Túrkııada zilzaladan keıin arada 248 saǵat ótkende 17 jastaǵy qyz qutqaryldy

ASTANA. QazAqparat - Túrkııanyń Kahramanmarash provıntsııasynda joıqyn jer silkinisinen keıin 248 saǵat ótken soń 17 jastaǵy boıjetken qutqaryldy, dep habarlaıdy QazAqparat Anadoly agenttigine silteme jasap.

Apat bolǵan jerde izdeý-qutqarý jumystary 11-shi kún qatarynan jalǵasyp jatyr.

Aleına Olmez esimdi boıjetken Kahramanmarash qalasy Kaıabashy kvartalynda úıindi astynan shyǵaryp alyndy.

Alǵashqy kómek kórsetilgennen keıin aýrýhanaǵa jetkizildi.

«Biz boıjetkenmen únemi baılanysyp otyrdyq. Birinshi qolynan ustap otyrdyq, keıin tolyq shyǵaryp aldyq. Jaǵdaıy jaqsy, sóılese alady. Osyndaı jaqsy jańalyqtar apat bolǵan jerlerde jalǵasyn tabady dep úmittenemin», - deıdi qutqarýshy Hadjer Atlas.

Eske salaıyq, Túrkııada zilzaladan qaza tapqandar sany 36,1 myńnan asty.

Foto: Anadolu Agency