Túrkııada zilzaladan keıin 198 saǵat ótkende 18 jastaǵy jigit qutqaryldy

ASTANA. Anadoly-QazAqparat - Túrkııanyń Adyıaman qalasynda zilzaladan keıin arada 198 saǵattan soń úıindi astynan 18 jastaǵy Mýhammed Djafer Chetın qutqaryldy, dep habarlaıdy QazAqparat Anadoly agenttigine silteme jasap.

Quramynda Túrkııa qarýly kúshteriniń áskerı qyzmetkerleri, kenshiler, eriktiler bar qutqarý brıgadasy Abdýl Mýsa kóshesiniń boıyndaǵy jeti qabatty turǵyn úıdiń úıindisi astynan jas jigitti tapqan.

Segiz kúnnen astam ýaqyt qırandy astynda jatqan Chetındi birden aýrýhanaǵa áketti.

1992 jyly 13 naýryzda Túrkııanyń Erzındjan provıntsııasynda jer silkinisinen keıin 187 saǵat ótkende Nýrdjan Eraslan esimdi medbıke qutqarylǵan bolatyn.

Eske sala keteıik, 6 aqpanda epıtsentri Túrkııanyń Kahramanmarash qalasynda bolǵan joıqyn jer silkinisinen qaza tapqandar sany búginde 31,6 myńnan asty.

Prezıdent Rejep Taıyp Erdoǵan tabıǵı apat qurbandaryn eske alý úshin Túrkııada jeti kúndik ulttyq aza tutý jarııalady. Túrkııanyń memlekettik týy búkil elde jartylaı túsirildi.

Joıqyn jer silkinisi kórshiles elderde, sonyń ishinde Sırııa, Lıvan, Soltústik Kıprdiń Túrik Respýblıkasy, Grekııa Kıprinde jáne Irakta da sezildi.

Foto : aa.com.tr