Túrkııada zilzala qurbandarynyń sany 6,2 myńnan asty

ASTANA. QazAqparat – Túrkııadaǵy eki joıqyn jer silkinisinen qaza tapqandar sany 6234-ke jetti, 37 011 adam jaraqat aldy, dep habarlaıdy QazAqparat Anadolý agenttigine silteme jasap.

Túrkııanyń 10 provıntsııasynda izdeý-qutqarý jumystary jalǵasýda. Hataı provıntsııasynda 24 jastaǵy muǵalim Mesýda Akar qıraǵan ǵımarattyń astynan 49 saǵattan keıin qutqaryldy.

Sondaı-aq Túrkııa áýe kúshteriniń ushaǵy Malatııa provıntsııasynan jaralanǵan 31 adamdy Ystanbulǵa jetkizdi.

Aıta ketsek, Qazaqstan Tótenshe jaǵdaılar mınıstrliginiń qutqarýshylary jer silkinisi saldaryn joıýǵa kómek kórsetý úshin Almatydan Túrkııaǵa attandy.

Onyń quramynda Qazaqstannyń respýblıkalyq jedel qutqarý jasaǵynyń qutqarýshylary, medıtsınalyq qyzmetkerler jáne qutqarýshy ıtter bar.

Tıisti tapsyrmany Qazaqstan Prezıdenti Qasym-Jomart Toqaev berdi. Qazaqstan Túrkııaǵa shuǵyl kómek retinde 1 mıllıon dollar beredi.

Túrkııa Prezıdenti Rejep Taıyp Erdoǵan eldiń ońtústik-shyǵysynda bolǵan joıqyn jer silkinisine baılanysty 12 aqpanǵa deıin jeti kúndik ulttyq aza tutý jarııalady.

Foto: facebook.com/AnadoluAgencyRussia