Túrkııada zilzala qurbandarynyń sany 39,6 myńnan asty

ANKARA. ANADOLY – QazAqparat – Túrkııanyń ońtústiginde bolǵan joıqyn jer silkinisinen qaza tapqandar sany 39 672-ge jetti. Bul týraly CNN Türk telearnasynyń efırinde eldiń Іshki ister mınıstrliginiń basshysy Súleıman Soılý málimdedi, dep habarlaıdy QazAqparat Anadoly agenttigine silteme jasap.

Onyń aıtýynsha, tabıǵat apaty kezinde qulaǵan 20 myńnan astam ǵımarat ornynda izdestirý-qutqarý jumystary júrgizildi. Vedomstvo basshysy izdestirý-qutqarý jumystarynyń basym bóligi aıaqtalǵanyn aıtty.

6 aqpanda Kahramanmarashta magnıtýdasy 7 baldan asatyn eki jer silkinisi boldy. Jer silkinisi eldiń 10 provıntsııasynda, sondaı-aq kórshiles memleketterde, sonyń ishinde Sırııada da sezildi.
Prezıdent Rejep Taıyp Erdoǵan tabıǵı apat qurbandaryna baılanysty Túrkııada jeti kúndik ulttyq aza tutý jarııalady. Memleket basshysy Qasym-Jomart Toqaev Túrkııa prezıdenti Rejep Taıyp Erdoǵanǵa qurban bolǵandarǵa baılanysty kóńil aıtty.
Qazaqstan Túrkııaǵa shuǵyl kómek kórsetý úshin bir mıllıon dollar bóldi. Arnaıy eki reıspen 101 adamnan turatyn dárigerler men qutqarýshylar toby jetkizildi. Qazaqstandyq qutqarýshylar úıindi astynan 7 adamdy alyp shyqty.
Sondaı-aq, Qazaqstan apat aımaǵyna 160 tonnadan astam gýmanıtarlyq kómek, 28 generator jiberdi.
Túrkııadaǵy jer silkinisinen zardap shekkenderge qazaqstandyqtar 3 mıllıon 600 myń AQSh dollarynan astam qarjy jınady.
Sondaı-aq, qazaqstandyqtar kıiz úı satyp alýǵa 20 mıllıon teńgeden astam qarjy jınaǵan. 17 mln 300 myń teńgege 45 kıiz úı satyp alyndy. Qazaqstandyq kásipkerler de qol ushyn sozyp, 50-ge jýyq kıiz úı satyp aldy. Nátıjesinde Túrkııaǵa 100-ge jýyq kıiz úı jiberildi.
Qazaqstandyq qutqarýshylardyń alǵashqy eshelony Túrkııadan búgin, 18 aqpanda oralady.

Foto: aa.com.tr