Túrkııada júrgen qazaqstandyq qutqarýshynyń Almatyda sábıi dúnıege keldi

ALMATY. QazAqparat – Túrkııadaǵy joıqyn zilzaladan zardap shekkenderdi izdestirý-qutqarý jumysyna atsalysyp jatqan qazaqstandyq qutqarýshy Birjan Baıqulovtyń otbasynda qýanysh boldy, dep habarlaıdy QazAqparat.

«Túrkııadaǵy joıqyn jer silkinisiniń zardabyn joıýǵa qatysyp jatqan qazaqstandyq qutqarýshylardyń úlken komandasynyń quramyndaǵy TJM Respýblıkalyq jedel-qutqarý jasaǵynyń bas qutqarýshysy Birjan Baıqulovtyń búgin Almatyda qyzy dúnıege keldi. Qyzǵa ıAsmına degen ádemi esim bergen.

Biz erjúrek qutqarýshymyzdy qyzynyń dúnıege kelýimen quttyqtaımyz jáne oǵan zor densaýlyq tileımiz. Al Birjannyń ózine Otanyna tezirek aman-esen oralýyna tilektespiz! Qyzmet úshin rahmet!», - delingen Qazaqstan Tótenshe jaǵdaılar mınıstrliginiń baspasóz qyzmeti taratqan habarlamada.

Eske salaıyq, Qazaqstan qutqarýshylary mingen bort 7 aqpan kúni Gazıantepke attanǵan bolatyn. Mamandarymyzdyń ekinshi toby 8 aqpanda keshqurym jetti.

Túrik elinde zilzala kezinde joǵalyp ketken birneshe qazaqstandyq tabyldy. Onyń biri – Sabına Mamadıarova 8 aqpan kúni úıindi astynan aman shyǵaryldy.

Hataıda jumys istep jatqan qazaqstandyq qutqarýshylar Ádil Qadirbekovtiń óli denesin tapty. Kóp uzamaı Mırbolat Qurmashevtiń denesi de qırandy astynan tabyldy.

6 aqpanda Túrkııada bolǵan joıqyn zilzaladan qaza bolǵandar sany sońǵy málimetke sáıkes, 24 myńnan asty.

QR TJM málimetinshe, qazaqstandyq qutqarýshylar búginge deıin úıindiler astynan 26 adamdy alyp shyqty, olardyń jeteýi - aman.

Qazaqstan mamandary Túrkııada medıtsınalyq kómek kórsetý pýnktin de ashyp, zardap shekkenderge kómek kórsetip jatyr.

Foto: t.me/qr_tjm