Túrkııada jumyssyzdyq azaıdy: jumyspen qamtylǵandar sany 155 myńǵa ósti
ASTANA. KAZINFORM — Túrkııada bıylǵy jyldyń ekinshi toqsanynda jumyssyzdyq deńgeıi 7,9%-ǵa deıin tómendep, jumyspen qamtylǵandar sany 155 myń adamǵa artty. Bul týraly Kazinform agenttiginiń Ankaradaǵy menshikti tilshisi habarlady.
Túrkııanyń Statıstıka ınstıtýtynyń (TÜİK) málimetinshe, 2026 jyldyń sáýir-maýsym aılarynda eldegi maýsymdyq túzetilgen jumyssyzdyq deńgeıi aldyńǵy toqsanmen salystyrǵanda 0,3 paıyzdyq tarmaqqa tómendep, 7,9%-dy qurady.
15 jastan asqan jumyssyzdar sany 84 myń adamǵa azaıyp, 2,8 mln adamǵa deıin tómendedi. Erler arasyndaǵy jumyssyzdyq deńgeıi 6,7% bolsa, áıelder arasynda bul kórsetkish 10,3%-dy qurady.
Jumyspen qamtý deńgeıi 0,1 paıyzdyq tarmaqqa ósip, 48,5%-ǵa jetti. Jumyspen qamtylǵandar sany 155 myń adamǵa artyp, 32,48 mln adamdy qurady. Al jumys kúshiniń sany 71 myń adamǵa kóbeıip, 35,28 mln adamǵa jetti. Jumys kúshine qatysý deńgeıi 52,7% boldy.
Jastar arasyndaǵy jumyssyzdyq kórsetkishinde de aıtarlyqtaı jaqsarý baıqaldy. 15-24 jas aralyǵyndaǵy jastar arasyndaǵy jumyssyzdyq 1 paıyzdyq tarmaqqa tómendep, 13,9%-dy qurady. Jas jigitter arasyndaǵy kórsetkish 11%, al qyzdar arasynda 19,3% boldy.
Jumyspen qamtý boıynsha qyzmet kórsetý salasy kósh bastaǵan — 240 myń adam. Qurylys salasynda jumyspen qamtylǵandar sany 25 myńǵa, aýyl sharýashylyǵynda 10 myńǵa artty. Al ónerkásip salasynda jumys oryndarynyń sany 121 myńǵa qysqardy.
Jumyspen qamtylǵandardyń qurylymynda qyzmet kórsetý salasynyń úlesi 59,8%, ónerkásiptiń úlesi 19,7%, aýyl sharýashylyǵynyń úlesi 13,7%, al qurylys salasynyń úlesi 6,8% boldy.
Eńbek resýrstarynyń tolyq paıdalanylmaýyn kórsetetin keshendi kórsetkish te 0,2 paıyzdyq tarmaqqa tómendep, 29,9%-dy qurady. Bul kórsetkish eńbek naryǵyndaǵy jalpy jaǵdaıdyń jaqsarǵanyn kórsetedi.
Túrkııanyń Qarjy jáne qazyna mınıstri Mehmet Shımshek aýyl sharýashylyǵyn qospaǵandaǵy sektorlarda sońǵy bir jyldaǵy beıresmı jumyspen qamtýdyń ortasha deńgeıi 15,7% bolǵanyn atap ótti. Onyń aıtýynsha, bul kórsetkish tarıhı ortasha deńgeıden aıtarlyqtaı tómen.
Shımshek áleýmettik saqtandyrý júıesimen qamtylǵan resmı jumyspen qamtýdyń ósýi memlekettik qarjyǵa da eleýli paıda ákeletinin atap ótti. Túrkııa bıligi adamı kapıtaldy damytýǵa, jumyspen qamtýdy qoldaýǵa jáne halyqtyń eńbek naryǵyna qatysý deńgeıin arttyrýǵa baǵyttalǵan saıasatty jalǵastyratynyn málimdedi.
Buǵan deıin Túrkııada jyldyq ınflıatsııanyń ótken aıda 31,75%-ǵa deıin baıaýlaǵanyn habarlaǵan edik.
