Túrkııada jumyrtqa baǵasy eki ese ósti

ASTANA. KAZINFORM — Túrkııada jumyrtqa baǵasynyń kúrt ósýi baıqalady. Sońǵy tórt aıda ónim eki ese qymbattady, dep habarlaıdy AZERTADJ.  

Eger 2024 jyldyń jeltoqsanynda dúkenderde 30 jumyrtqa 100-120 lıraǵa satylsa, búginde jumyrtqa baǵasy 250 lıraǵa jetken.

Türkiye gazetiniń derekterine sáıkes baǵa ósiminiń basty sebebi — eksporttyń ulǵaıýynda.

Sondaı-aq bir jaǵynan naryqtaǵy jaǵdaıǵa Amerıka bıliginiń elde qus tumaýynyń taralýyna baılanysty jumyrtqany belsendi ımporttaý týraly sheshimi de áser etti.

Sońǵy aılarda Brazılııa men Ońtústik Koreıa da Túrkııadan jumyrtqalardy belsendi satyp ala bastady.

Іshki naryqtaǵy jaǵdaıdy turaqtandyrý maqsatynda Túrkııa bıligi naýryzdyń sońynda AQSh-qa jumyrtqa eksportyn yntalandyrýdyń qarjylyq quraldarynan bas tartty.

Alaıda, bul sharalar Amerıka Qurama Shtattaryna jetkizilimdi ishinara ǵana tómendetti. Sebebi AQSh-ta jumyrtqa baǵasy rekordtyq deńgeıge jetken.

Túrkııada jylyna 20 mıllıardtan asa jumyrtqa óndiriledi, onyń 3,4-4 mıllıardy álemniń 55 eline jetkiziledi. Eldiń eń iri ımporttaýshylary — BAÁ, Qatar, Irak, Oman jáne Sırııa sanalady. Al jyl qorytyndysy boıynsha jumyrtqa eksportynan túsetin kirister 500 mln dollar deńgeıinde eken.

Bul rette, AQSh-pen jańa yntymaqtastyqqa sáıkes, bıyl shildege deıin Amerıkaǵa 15 myń tonna eksporttaý josparlanyp otyr, bul óz kezeginde Túrkııaǵa 26 mln dollar tabys ákeledi.

Osyǵan deıin Erdoǵan oppozıtsııa lıderin qorlaǵany úshin sotqa bergeni habarlandy.