Túrkııada jolaýshylardy zańsyz tasymaldaǵandar kólik júrgizý quqyǵynan aıyrylady
ASTANA. KAZINFORM – Túrkııada jolaýshylardy zańsyz tasymaldaýǵa qarsy qatań sharalar kúshine endi.
El parlamentine usynylǵan jańa zań jobasynda tártip buzýshylardy júrgizýshi kýáliginen aıyrý usynylǵan. Zań jobasy jol qozǵalysy týraly 2918-shi zańǵa ózgeristerdi qamtyp, zańsyz tasymaldaý úshin jazany qatańyraq jáne tıimdi etedi.
Usynylǵan zań jobasyna sáıkes, jolaýshylardy zańsyz tasymaldaýmen aınalysatyn júrgizýshiler (Túrkııada «taksı qaraqshylary» degen ataýmen belgili) kýálikterinen aıyrylady. Birinshi ret buzǵany úshin olar 6 aıǵa júrgizýshi kýáliginen aıyrylady. Bir jyl ishinde qaıtalap buzǵan jaǵdaıda júrgizýshi kýáliginen aıyrý merzimi 1 jylǵa deıin ulǵaıtylady jáne bul merzimde júrgizýshige jańa nemese ýaqytsha júrgizýshi kýálikterin alýǵa tyıym salynady.
Mundaı sanktsııalardy engizýge zańsyz tasymaldaýdyń ekonomıka men qaýipsizdikke tıgizetin aýyr saldary sebep bolyp otyr. Zańsyz taksı júrgizýshileri resmı kólik kompanııalaryna aıtarlyqtaı zııan keltirip, sonymen qatar jolaýshylardyń qaýipsizdigine qaýip tóndiredi, óıtkeni olardyń kópshiligi tıisti daıyndyqsyz jáne baqylaýsyz jumys isteıdi.
Osy ýaqytqa deıin tártip buzýshylarǵa tek aıyppul salynyp, kólik quraldaryn 60 kúnge deıin paıdalanýǵa tyıym salynýy múmkin edi, alaıda mundaı sharalar jeke tasymaldaýshylarǵa qatty áser etken joq.
Bılik bul sharalar jolaýshylar tasymaly naryǵyn tazartýǵa jáne eldegi jol qaýipsizdigin jaqsartýǵa septigin tıgizetinine senimdi.
Buǵan deıin Túrkııada sapasyz ónimderdi tutyný qaýpi týraly eskertilgenin jazǵan bolatynbyz.