Túrkııada jol apatynan 16 jastaǵy jasóspirim qaza tapty
ASTANA. KAZINFORM — Túrkııanyń Kahramanmarash provıntsııasynda eki avtokólik soqtyǵysyp, 16 jastaǵy Samet Ózdemır qaza tapty, taǵy jeti adam jaralandy, dep habarlaıdy Kazinform Türkiye Gazetesi basylymyna silteme jasap.
Zardap shekkenderdiń arasynda Túrkııa parlamentiniń Ultshyl qozǵalys partııasynyń (UQP) depýtaty Zýhal Karakoch pen partııanyń aımaqtyq fılıalynyń basshysy Mansýr Metehan bar.
Jol apaty 11 qazanda Afshın aýdanyndaǵy Afshın — Elbıstan tasjolynda bolǵan. Jeńil avtokólik pen shaǵyn júk kóligi soqtyǵysqan. Túrik BAQ-tarynyń habarlaýynsha, kólikterdiń birinde Zýhal Karakoch pen Mansýr Metehan bolǵan, al 16 jastaǵy Samet Ózdemır shaǵyn júk kóliginde otyrǵan.
Depýtattyń kúzetinde bolǵan polıtsııa qyzmetkeri de oqıǵa kezinde kólikte bolǵan. Jeti jaraly da Afshın aýdandyq memlekettik aýrýhanasyna jetkizildi. Alǵashqy medıtsınalyq kómek kórsetilgen soń, Zýhal Karakoch Kahramanmarash qalasyndaǵy aýrýhanaǵa aýystyryldy.
Provıntsııa gýbernatory Mıýkerrem ıÝnlıýerdiń málimdeýinshe, zardap shekkenderdiń jaǵdaıy jaqsy, depýtattyń ómirine qaýip tónip turǵan joq. Alaıda jol apaty onyń belindegi burynnan bar syrqatyn asqyndyryp jibergen.
Qosymsha tekserýden ótkizý úshin Zýhal Karakochty Ankaraǵa jetkizý týraly sheshim qabyldandy.
Buǵan deıin Túrkııada týrıster mingen avtobýs pen júk kóligi soqtyǵysyp, 11 adam qaza tapqany habarlanǵan bolatyn.
