Túrkııada joǵary bilim júıesin aýqymdy reformalaý josparlanyp otyr
ASTANA. KAZINFORM — Túrkııada joǵary bilim berý júıesin keshendi reformalaýǵa baǵyttalǵan zań jobasy parlamenttiń qaraýyna engizildi. Qujat stýdentterge akademııalyq raqymshylyq jasaýdy jáne joǵary oqý oryndaryna qoıylatyn talaptardy kúsheıtýdi kózdeıdi, dep habarlaıdy Kazinform agenttiginiń Ankaradaǵy menshikti tilshisi.
Hürriyet Daily News basylymynyń málimetinshe, zań jobasynyń negizgi jańalyqtarynyń biri – 2022 jylǵa deıin jarııalanǵan akademııalyq raqymshylyqtardy paıdalanbaǵan, buryn oqýdan shyǵarylǵan nemese oqýyn toqtatqan stýdentterdiń joǵary oqý oryndaryna qaıta oralýyna múmkindik berý.
Zań kúshine engennen keıin olar ótinish berý úshin tórt aı ýaqyt alady. Mindetti áskerı qyzmette júrgen azamattar úshin bul merzim taǵy eki aıǵa uzartylady.
Alaıda akademııalyq raqymshylyq terrorızm, qasaqana kisi óltirý, jynystyq sıpattaǵy qylmystar, esirtki óndirý nemese taratý úshin sottalǵandarǵa, sondaı-aq jalǵan qujat paıdalanǵany úshin oqýǵa qabyldanýy joıylǵan tulǵalarǵa qoldanylmaıdy.
Sonymen qatar zań jobasy oqý baǵdarlamasynyń teorııalyq bóligin aıaqtap, biraq mindetti óndiristik tájirıbe nemese taǵylymdamadan óte almaǵan stýdentterge dıplom alýǵa múmkindik beredi.
Qujatta akademııalyq alaıaqtyq úshin jaýapkershilikti kúsheıtý de qarastyrylǵan. Basqa adamdardyń atynan dıplomdyq nemese dıssertatsııalyq jumystar jazǵan oqytýshylar jumystan shyǵarylýy múmkin. Al úshinshi tulǵalardyń eńbegi arqyly ǵylymı dáreje alǵan azamattar ǵylymı ataqtarynan aıyrylýy yqtımal.
Zań jobasynda sheteldik bilim berý baǵdarlamalaryn retteýge de erekshe nazar aýdarylǵan. Túrkııada sheteldik ýnıversıtetterdiń ruqsatsyz bilim berý baǵdarlamalaryn uıymdastyrǵandarǵa eki jyldan tórt jylǵa deıin bas bostandyǵynan aıyrý jazasyn engizý usynylǵan.
Budan bólek, memlekettik ýnıversıtetterge prezıdent jarlyǵymen shetelde kampýstar ashýǵa ruqsat berý, jańa oqytýshylardy qyzmetke taǵaıyndaý kezinde mindetti qaýipsizdik tekserisin engizý, zeınetke shyqqan professorlardyń kelisimshartyn 75 jasqa deıin uzartý jáne akademııalyq talaptarǵa saı kelmeıtin jekemenshik qor ýnıversıtetterine qatysty jabýǵa deıingi sanktsııalar qoldanýdyń quqyqtyq negizin qalyptastyrý kózdelgen.
