Túrkııada joǵalyp ketken reseılik júzýshiniń týystary sotqa shaǵym túsirmek

ASTANA. KAZINFORM – Túrkııada iz-tússiz joǵalyp ketken júzýshi Nıkolaı Svechnıkovtyń otbasy ótemaqy talap etip, sotqa shaǵym túsirmek, dep habarlaıdy Kazinform menshikti tilshisi.

Ystanbulda iz-tússiz joǵalǵan reseılik júzýshiniń týystary ótemaqy óndirý úshin sotqa shaǵym túsirýge daıyndalyp jatyr. Bul týraly onyń anasy Galına Svechnıkova habarlady. Onyń aıtýynsha, isti zań júzinde daıyndaýmen advokat aınalysyp otyr.

– Túrkııadaǵy advokat talap aryz daıyndap jatyr. Biz ótemaqy talap etemiz, biraq ázirge barlyq egjeı-tegjeıin asha almaımyz, - dep málimdedi ol.

Sportshyny izdeý jumystary jalǵasyp jatyr.

– Іzdeý amaldary júrip jatyr, ázirge nátıje joq. Olar keńeıtilip, Mármár teńizinde júzege asyrylady dep úmittenemiz, - dep qosty Galına Svechnıkova.

Nıkolaı Svechnıkov Túrkııada Bosfor buǵazy arqyly júzý kezinde joǵalyp ketti. Reseı men Túrkııa bıligi bul is boıynsha yntymaqtastyqty jalǵastyryp keledi.

Bosfor arqyly qurlyqaralyq júzý 1989 jyldan beri ótkizilip keledi jáne ashyq sýda júzý boıynsha eń bedeldi buqaralyq jarystardyń biri sanalady. Bedeline qaramastan, sońǵy jyldary qatysýshylar uıymdastyrý deńgeıi jáne qaýipsizdikke qatysty alańdaýshylyǵyn bildirip júr.

Túrkııada Bosfordy júzip ótpek bolǵan reseılik júzýshini izdestirý jumystary jalǵasyp jatqanyn jazǵan edik. 

Buǵan deıin Bosfor arqyly ótken qurlyqaralyq júzý kezinde reseılik sportshy Nıkolaı Svechnıkovtyń joǵalýynan keıin, Ystanbulda taǵy bir sheteldik azamat — Belarýs sporttyq yntymaqtastyq qorynyń halyqaralyq bólim basshysy Anatolıı Kotov jumbaq jaǵdaıda iz-túzsiz ketkenin jazǵan bolatynbyz.