Túrkııada jyldyq ınflıatsııa deńgeıi qaıtadan kóterildi

ASTANA. KAZINFORM – Túrkııada ınflıatsııa deńgeıi eki tańbaly mánde qalyp otyr, dep habarlaıdy Kazinform menshikti tilshisi.

Túrkııa Statıstıka ınstıtýty (TÜİK) 2025 jyldyń qyrkúıek aıyna arnalǵan ınflıatsııa boıynsha jańa derekterin jarııalady. Oǵan qaraǵanda, tutyný baǵalary bir aıda 3,23 paıyzǵy ósti, al jyldyq ınflıatsııa 33,29 paıyzǵa jetti.

Bul sandar eldegi ómir súrý qunyna qysymnyń jalǵasyp jatqanyn kórsetip otyr. Qyrkúıek aıyndaǵy kórsetkish sońǵy aılardaǵy ortasha mánnen asyp, bul taýarlar men qyzmetter baǵasynyń turaqty ósý úrdisin kórsetedi.

Inflıatsııalyq ósimniń negizgi draıverleri - bul dástúrli túrde azyq-túlik sektory, energııa resýrstary jáne turǵyn úıdi jalǵa berý. Jalpy baǵa deńgeıine sondaı-aq valıýtanyń aýytqýy jáne ımporttyq taýarlar baǵasynyń ózgerýi áser etýi múmkin.

Sarapshylar Túrkııa Ortalyq bankiniń ınflıatsııany baqylaýǵa tyrysýyna qaramastan baǵa deńgeıi mejelengen deńgeıden aıtarlyqtaı joǵary bolyp qalǵanyn atap ótti. Osy jaǵdaıda monetarlyq saıasattyń bolashaq sharalaryna, sondaı-aq úkimettiń áleýetti fıskaldyq qadamdaryna basa nazar aýdarylady.

Ekonomıster ásirese maýsymdyq faktorlardy jáne turaqsyz syrtqy ekonomıkalyq jaǵdaıdy eskere otyryp ınflıatsııalyq qysym tórtinshi toqsanda saqtalady dep boljap otyr.

Buǵan deıin tamyz aıynda Túrkııanyń jyldyq ınflıatsııa deńgeıi 32,95 paıyz bolǵanyn jazǵan edik. Bir aımen salystyrǵanda tutyný baǵasy 2,04 paıyzǵa ósti.