Túrkııada jyl saıyn shamamen 180 myń bala qylmystyq jaýapkershilikke tartylady

ASTANA. KAZINFORM — Sońǵy jyldary Túrkııada qylmystyq jaýapkershilikke tartylǵan balalar sany turaqty túrde artyp keledi. Sarapshylar bul úrdisti áleýmettik teńsizdik, qylmystyq mádenıettiń yqpaly jáne jazasyzdyq seziminiń kúsheıýimen baılanystyrady, dep habarlaıdy Kazinform menshikti tilshisi.

Túrkııanyń Statıstıka ınstıtýty (TÜİK) men Ádilet mınıstrliginiń derekterine sáıkes, elde jyl saıyn orta eseppen 180 myńǵa jýyq bala «qylmystyq jaýapkershilikke tartylǵan» sanatyna engiziledi.

2015 jyly mundaı jaǵdaılar sany shamamen 158 myńdy qurasa, 2024 jyly bul kórsetkish eń joǵary deńgeıge jetip, 189 myńǵa jýyqtaǵan. 2025 jyly kórsetkish azdap tómendegenimen, 186 myńnan asyp otyr.

Túrkııada árbir tórtinshi turǵyn bala ekenin eskersek, bul derekter máseleniń aýqymdy ekenin kórsetedi. Kámeletke tolmaǵandar kóbine densaýlyqqa qasaqana zııan keltirý, urlyq, qorqytý, qorlaý, múlikke zalal keltirý, sondaı-aq esirtkige qatysty qylmystar boıynsha isterde kezdesedi.

Quqyqtanýshylar men zań psıhologııasy salasyndaǵy mamandar COVID-19 pandemııasynan keıin balalar arasyndaǵy qylmystyń aıqyn óskenin atap ótedi.

Advokat Djemalettın Gıýrlerdiń aıtýynsha, sońǵy jyldary balalar qylmystyq toptar tarapynan jıi paıdalanylyp otyr. Al olardy qorǵaýǵa baǵyttalǵan qoldanystaǵy normalar keı jaǵdaıda jazasyzdyqqa jol ashyp, qoǵamda ádiletsizdik sezimin kúsheıtýde ári qylmystyq ortanyń nyǵaıýyna yqpal etýde.

Sarapshylar otbasyǵa áleýmettik qoldaýdy kúsheıtý, tárbıe júıesin jańǵyrtý, medıaǵa jáne qylmystyq saıasatqa qatysty tásilderdi qaıta qaraý sekildi keshendi sharalarsyz bul úrdisti toqtatý qıyn ekenin atap ótti.

Buǵan deıin Túrkııa psıhotroptyq preparattardy tutynýdan rekord ornatqanyn habarladyq.