Túrkııada jeti qabatty ǵımarat qulap, adamdar qırandy astynda qaldy

ASTANA. KAZINFORM – Kodjaelı provıntsııasynyń Gebze qalasynda 7 qabatty turǵyn úı qulady, dep habarlaıdy Kazinform menshikti tilshisi.

Túrkııa Іshki ister mınıstrliginiń málimetinshe, qırandy astynda adamdar bolýy múmkin. Ázirge qurban bolǵandar men jaraqat alǵandar týraly aqparat joq.

Oqıǵa ornyna polıtsııa, órt sóndirýshiler, Túrkııanyń apattardyń aldyn alý jáne joıý basqarmasy (AFAD), medıtsınalyq qyzmetter jáne eriktiler tez arada jiberildi. 

Іzdeý-qutqarý operatsııasyna 2 kınologııalyq top, qırandylardyń astyndaǵy adamdardy anyqtaýǵa arnalǵan 8 qurylǵy; 2 dron, 52 tehnıka jumyldyryldy. 

Túrkııanyń ishki ister mınıstri Álı Ierlıkaıa qutqarý jumystaryna 147 adam, onyń ishinde 80 AFAD mamany, sondaı-aq jergilikti mýnıtsıpaldyq qyzmetter men úkimettik emes uıymdardyń toptary jumyldyrylǵanyn habarlady. 

– Іzdeý-qutqarý jumystary jergilikti bıliktiń úılestirýimen qarqyndy jalǵasyp otyr. Oqıǵa ornyna mınıstrlikter men vedomstvolardyń basshylary keldi. Ǵımarat qırandylarynyń astynda áli de 5 adam qalyp qoıǵan degen boljam jasalyp otyr, - dedi mınıstr.

Jergilikti bılik qutqarý jumystaryna kedergi keltirmeý úshin turǵyndardy sol aımaqtan aýlaq bolýǵa shaqyrdy. 

Osyǵan deıin Túrkııanyń Balykesır provıntsııasynda 6,1 baldyq jer silkinisi tirkelgenin habarlaǵan bolatynbyz.