Túrkııada jer silkinisi kezinde qulaǵan úıdi salǵan merdiger 18 jylǵa sottaldy
ASTANA. KAZINFORM – Túrkııada jer silkinisi kezinde qulaǵan úıdi salǵan merdigeri Múslım Demırer 18 jyl 1,5 aıǵa bas bostandyǵynan aıyryldy. Bul týraly Anadolu agenttigi jazdy.
Bir jyl buryn bolǵan joıqyn jer silkinisi kezinde aımaqtaǵy úılerdiń qıraýyna baılanysty sot protsesi áli jalǵasyp jatyr.
Shanlyýrfada bir úı qulap, 34 adam qaza tapqan bolatyn. Ǵımarattyń qurylysyna jaýaptylardyń úsheýi jer silkinisine deıin qaıtys bolǵan.
Bastapqyda sot Múslım Demırerdi 21 jyl 9 aıǵa bas bostandyǵynan aıyrdy. Demırerdiń uly da jer silkinisi kezinde úılerdiń qulaýynan qaza tapty. Sot osy mán-jaıdy eskerip, merdigerge berilgen merzimdi qysqartty. Prokýrorlar men marqumdardyń jaqyndary sottan Demırerge eń aýyr jaza taǵaıyndaýdy suraǵan.
Eske sala keteıik, 2023 jyly 6 aqpanda Túrkııanyń ońtústik-shyǵysynda epıtsentri Kahramanmarashta magnıtýdasy 7-den asatyn eki iri jer silkinisi boldy. Jerasty dúmpýleri eldiń 10 provıntsııasynda, sondaı-aq kórshiles elderde, sonyń ishinde Sırııada da sezildi.
Túrkııada jer silkinisi kezinde qulaǵan turǵyn úılerge qatysty is boıynsha 269 adam qamaýǵa alyndy. Jer silkinisinen kelgen materıaldyq shyǵyn eki trıllıon túrik lırasyn (105 mıllıard dollardy) qurady.
Túrkııanyń ońtústik-shyǵysynda bolǵan joıqyn jer silkinisinen qaza tapqandar sany 50 myńnan asty.
