Túrkııada jer silkinisinen qaza bolǵandar sany 31-ge jetti

ANKARA. ANADOLY-QazAqparat – Túrkııada jer silkinisinen qaza bolǵandar sany 31-ge jetti. Bul týraly el úkimeti janyndaǵy Tótenshe jaǵdaılardyń aldyn alý jáne saldaryn joıý jónindegi basqarmadan (AFAD) málim etti, dep habarlaıdy «QazAqparat» HAA Anadoly agenttigine silteme jasap.

Málim etilgendeı, qutqarýshylar úıindiler astynan zardap shekken 44 adamdy alyp shyqty. Medıtsınalyq kómekke barlyǵy 1566 adam júgingen. 76 ǵımarat qırap, 643 nysanǵa aıtarlyqtaı nuqsan kelgen. 425 nysan jeńil jáne ortasha deńgeıde zaqymdandy.

Zilzaladan keıin ile-shala 599 aftershok tirkeldi.

Buǵan deıin habarlaǵanymyzdaı, Túrkııa shyǵysynda 24 qańtar kúni jergilikti saǵat 20.55-te 6,8 magnıtýdasymen jer silkindi. Jerasty epıtsentri Sıvrıdje ýezinde Elıazyg provıntsııasynda ornalasty. Myńdaǵan adam túnderin kóshede ótkizdi.

AFAD-tyń aqparatyna súıensek, zilzaladan soń 4,0 jáne odan joǵary ball qýatymen aftershoktar boldy. Jerasty dúmpýleri Elıazygqa jaqyn ornalasqan provıntsııalarda (Adana, Hataı, Osmanıe, Týndjelı, Gazıantep, Shanlyýrfa, Malatıa, Mardın, Samsýn, Tokat, Chorým jáne Kaıserı), sondaı-aq Sırııa soltústiginde sezildi.

QR SІM málimeti boıynsha, Túrkııadaǵy tabıǵı apattan zardap shekkender arasynda qazaqstandyqtar joq.

El prezıdenti Redjep Taııp Erdoǵanǵa Memleket basshysy Qasym-Jomart Toqaev jáne Elbasy Nursultan Nazarbaev kóńil aıtty.