Túrkııada jer silkinisinen 49 kún ótkende Han atty mysyq aman tabyldy
6 aqpanda jer silkinisi bolǵan kezde týrızm bıznesimen aınalysatyn 36 jastaǵy Nıda Dına qyzy Nıl Berıl Tashgetırenmen jáne brıtandyq 2 jasar Han atty mysyǵymen birge úıde edi.
Olar «12 Aqpan» aýdanyndaǵy Reıhan Kent, 1 mekenjaıynda kóppáterli úıde turatyn.
Dına alǵashqy jer silkinisi bolǵan kezde qyzymen birge tez-tez úıden qashyp shyqqan, al mysyq sol kúıi páterde qalyp qoıǵan.
Sol kúngi ekinshi zilzaladan keıin 11 qabatty úı qırap, túgel qulady. Qırandynyń astynda qalǵan mysyqty tabý múmkin bolmady.
Nıda Dına úıindiniń qasynan ketpeı 40 kúnge jýyq kólikte otyryp, mysyǵyn kútti. Ol mysyǵynyń sýretin jaqyn mańdaǵy adamdarǵa kórsetip, kórgen-kórmegenin surap shyqqanyn aıtady, alaıda kóp adam ony túsinbegen.
Arada 49 kún ótkende Han tiri tabylǵanda ol óz kózine sene almaı, qatty qýandy.
Mysyq júre almaıdy, aıaǵy synǵan. Ol qazir emdelip jatyr.
«Mysyǵymdy taptym. Bul biz úshin adam sengisiz tańǵajaıyp oqıǵa boldy. Sońǵy sátke deıin úmitimdi úzgen emespin. Ol únemi meniń janymda uıyqtaıtyn. Qırandylardy arshyp jatqan ekskavator júrgizýshisi men ǵımarattyń ıesi ony as úıdegi kilemniń ústinen taýypty. Ony birden veterınarǵa apardyq. Jaǵdaıy nashar, dárigerler ishki múshelerin de qarap, emdep jatyr. Eshqandaı qıyndyqsyz densaýlyǵy qalpyna keledi dep senemin», - deıdi mysyqtyń ıesi.
Veterınar Fatmagúl Hanjyoǵly sońǵy 2 jyl boıy mysyqty ózi qarap, ekpe salyp kelgen eken.
«49 kúnnen keıin aman tabylǵanyna óte qýanyshtymyz. Aǵzasy sýsyzdanǵan, kóp suıyqtyq berip jatyrmyz. Emin ári qaraı jalǵastyramyz. Tiri qalady dep úmittenemin», - deıdi veterınar.
Ǵımarat ıesi Fahrı Hatıpoǵlynyń aıtýynsha, asúıdegi ydystardy syrtqa shyǵarmaq bolyp úıindini qazyp jatqanda mysyqty baıqap qalǵan.
«Dostarymmen birge alaqanymyzǵa salyp syrtqa alyp shyqtyq. Sosyn birden ıesine jetkizdik. Qojaıyny eshqaıda ketpeı, áli osynda kútip júrgen edi»,-deıdi ol.
Ol mysyqty qutqarý sátin uıaly telefonynyń kamerasyna túsirip alǵanyn aıtady.
