Túrkııada jer silkinisi qurbandarynyń sany 36,1 myńnan asty

ASTANA. Anadoly-QazAqparat – 16 aqpandaǵy jaǵdaı boıynsha, Túrkııada joıqyn jer silkinisinen 36 187 adam qaza tapqan. Bul týraly TJ saldaryn joıý basqarmasynan (AFAD) málim etti, dep habarlaıdy QazAqparat Anadoly agenttigine silteme jasap.

AFAD málimetinshe, Kahramanmarashtaǵy eki zilzaladan keıin 4 323 aftershok tirkelgen.

Túrkııa provıntsııalarynda 108 068 adam zardap shegip, 216 347 adam evakýatsııalandy.

Іzdeý-qutqarý jumystaryna Túrkııadan 29 944 qutqarýshy jáne basqa elderden 11 488 adam tartyldy.

AFAD, polıtsııa, jandarmerııa, Ulttyq qorǵanys mınıstrligi, Ulttyq medıtsınalyq qutqarý komandasy (UMKE), jedel járdem brıgadalary, eriktiler, jergilikti qaýipsizdik kúshteri men qoldaýshy toptardy eskere otyryp, apat saldaryn joıýǵa tartylǵan qyzmetkerler sany 253 016 adamǵa jetti.

Apat bolǵan aýdanǵa 12 myń 513 arnaıy tehnıka jetkizildi, sonyń ishinde evakýatorlar, krandar, býldozerler, júk kólikteri, sý tasıtyn kólikter, tirkemeler jáne taǵy basqalar bar.

Dúısenbi, 6 aqpanda Kahramanmarashta magnıtýdasy jeti baldan asatyn eki jer silkinisi (jergilikti ýaqytpen 04.17-de 7,7 ball jáne 13.24-te 7,6 ball) tirkeldi.

Túrkııa Prezıdenti Rejep Taıyp Erdoǵan eldiń ońtústik-shyǵysynda bolǵan joıqyn jer silkinisine baılanysty jeti kúndik ulttyq aza tutý jarııalady.

Joıqyn zilzala kórshi elderde, sonyń ishinde Sırııa, Lıvan, Kıpr men Irakta sezilgen.

Foto: aa.com.tr