Túrkııada jel energetıkasynyń qýaty 16 GVt-qa jýyqtady
ASTANA. KAZINFORM – Sońǵy jyldardaǵy jańa qýattardy rekordtyq kólemde iske qosý nátıjesinde Túrkııada jel energetıkasy turaqty ósimin jalǵastyryp keledi, dep habarlaıdy Kazinform agenttiginiń menshikti tilshisi.
Túrkııanyń jel energetıkasy qaýymdastyǵy jarııalaǵan salalyq esepke sáıkes, bıylǵy qańtar aıyndaǵy jaǵdaı boıynsha eldegi jel elektr stansalarynyń ornatylǵan qýaty 15 934 megavattqa jetken. Mundaı kórsetkishke ótken jyly paıdalanýǵa berilgen 2 141 megavatt kólemindegi jańa qýattardyń esebinen qol jetkizilgen.
Salanyń damýy turaqty ári kezeń-kezeńimen júzege asýda. Jel energetıkasy qýattarynyń eń joǵary shoǵyrlanýy Mármár óńirine tıesili – 6 968 megavatt.
Ekinshi orynda Egeı óńiri tur, munda kórsetkish 4 495 megavattty quraıdy.
Odan keıin Ortalyq Anadoly óńiri keledi, onyń úlesi – 1 733 megavatt.
Qalalar arasynda jel energetıkasynyń ornatylǵan qýaty boıynsha kóshbasshy bolyp Izmır qalasy qalyp otyr – 2 307 megavatt. Odan keıin Chanakkale, Balykesır, Stambýl jáne Manısa ornalasqan.
TÜREB prezıdenti Ibrahım Erden 2025 jyldyń tek qýattardy arttyrý turǵysynan ǵana emes, ınvestıtsııalyq ahýaldy jaqsartý sharalary arqyly da mańyzdy ekenin atap ótti. Onyń aıtýynsha, ruqsat berý rásimderin jeńildetý jáne qýattardy bólý tetikterin damytý ınvestorlar úshin neǵurlym boljamdy jaǵdaı qalyptastyryp, uzaq merzimdi josparlaýǵa múmkindik beredi.
Qaýymdastyqta sondaı-aq 2035 jylǵa qaraı jel jáne kún energetıkasynyń jıyntyq ornatylǵan qýatyn 120 myń megavattqa deıin jetkizý maqsat etilip otyrǵany aıtyldy. Bul aldaǵy jyldardaǵy ınvestıtsııalyq belsendiliktiń negizgi baǵdaryn aıqyndaıdy.
Buǵan deıin sırek kezdesetin protsess Túrkııa topografııasyn ózgertip jatqany habarlanǵan bolatyn.
