Túrkııada jeksenbi kúnderi dúkenderdi jabý usynyldy

ASTANA.KAZINFORM — Túrkııa bıligi bólshek saýdagerlerge demalys kúnin engizýdi qarastyryp jatyr, dep habarlaıdy Kazinform agenttiginiń menshikti tilshisi. 

Túrkııanyń Saýda mınıstri Ómer Bolat jeksenbi kúnderi sýpermarketterdi jabý ıdeıasyn qoldaıtynyn bildirdi. Ol kásipqoı qaýymdastyqtar birtutas usynys jasasa, mınıstrlik erejeni júzege asyrýǵa daıyn ekenin málimdedi.

Bul bastamany Túrkııa bólshek saýda federatsııasy (TPF) qyrkúıektiń basynda kótergen bolatyn. Basty maqsat — bólshek saýda qyzmetkerleriniń eńbek jaǵdaıyn jaqsartý, demalys kúnin otbasymen ótkizýge múmkindik berý jáne jańa jumysqa qabyldanǵandar úshin salany tartymdy etý.

— Eger barlyq múddeli tarap, sonyń ishinde kásipodaqtar, qaýymdastyqtar jáne bıznes ókilderi qoldaý bildirse, biz jeksenbi kúnderi dúkenderdi jabýdy qarastyramyz. Bul ulttyq deńgeıde de, jekelegen aımaqtarda da júzege asyrylýy múmkin, — dedi túrik mınıstri.

Eger qabyldansa, sheshim iri saýda jelileri men sýpermarketterge áser etýi múmkin, al shaǵyn dúkender úshin erekshe jaǵdaı jasalýy múmkin. Sondaı-aq ıkemdi retteý modeli talqylanýda, mysaly, provıntsııa ákimderine aımaqtyń ekonomıkalyq jáne áleýmettik erekshelikterine negizdelgen tańdaý quqyǵyn berý.

Belgili bolǵandaı, Túrkııada kóptegen saýda núktesi, tipti dárihanalar demalys kúnderi jabylady. Dúkenderdi qosý týraly usynys qazir talqylanyp jatyr. Alaıda, eldegi ekonomıkalyq qıyndyqtardy eskere otyryp, kásipkerler ásirese demalys kúnderi eń joǵary satylymǵa muqtaj.

Birneshe jyl boıy joǵary ınflıatsııa, valıýtanyń qunsyzdanýy jáne turaqsyz ekonomıkalyq saıasattan keıin Túrkııanyń teńgerimdi ósý úlgisine ótý belgilerin kórsetip jatqanyn buǵan deıin habarlaǵan bolatynbyz.