Túrkııada jarylystan keıin «Feısbýk» jáne «Tvıtter» áleýmettik jelileri buǵattaldy
ASTANA. QazAqparat - Ankara soty qaladaǵy jarylystan keıin «Feısbýk» jáne «Tvıtter» áleýmettik jelilerin buǵattaý týraly qaýly shyǵardy, dep habarlady «VVS» agenttigi jergilikti BAQ-qa silteme jasaı otyryp.
Mundaı sheshim jeksenbi keshke qalada oryn alǵan jarylysqa baılanysty bolyp otyr. Sońǵy aqparat boıynsha, oqıǵadan 34 adam qaza taýyp, 125-i jaralandy.
Bılik oqıǵa ornynan fotolar men vıdeolardy kýágerler kóp taratpaýy úshin áleýmettik jelilerdi buǵattaý qajet bolǵandyǵyn jetkizdi.
Oqıǵa bolǵan jerden osy ýaqytqa deıin birqatar sýretter áleýmettik jelilerde jarııalanyp úlgerdi.
Jarylys Ankara qalasyndaǵy basty kóshelerdiń qıylysynda jergilikti ýaqytpen 18-40-ta (Astana ýaqytymen saǵat: 22-40) boldy. Sol jerde kóp adam jınalǵan aıaldama bolǵan.
Jarylysqa qatysty lańkestik uıymdar ázir málimdeme jarııalaǵan joq. Reıter agenttiginiń habarlaýynsha, túrik arnaıy qyzmetiniń ókili bılik buǵan «Kúrdistan jumys partııasy» nemese osy uıymǵa qatysty adamdardy kúdikti bolýy múmkin dep sanaıtynyn aıtqan.
