Túrkııada janar-jaǵarmaı baǵasy ósti
ASTANA. KAZINFORM — Túrkııada sońǵy ýaqytta dızel otynynyń baǵasy kóterildi, dep habarlaıdy Kazinform agenttiginiń Ankaradaǵy menshikti tilshisi.
Dızel otynynyń baǵasy shamamen 6,5 lıraǵa óskennen keıin onyń bir lıtri Ystanbuldyń eýropalyq bóliginde 95,60 lıraǵa, Ankarada 96,75 lıraǵa, Izmırde 97,02 lıraǵa jetti. Al benzınniń bir lıtri tıisinshe 80,26, 81,25 jáne 81,52 lıradan satyldy.
Sońǵy bir aıda janar-jaǵarmaı baǵasy aıtarlyqtaı kóterildi. Ystanbulda benzın baǵasy 8,87 lıraǵa ósip, ósim shamamen 12,4 paıyz boldy. Al dızel otynynyń baǵasy 15,99 lıraǵa kóterilip, shamamen 20,1 paıyz artty.
Tamyz aıynda dızel otynynyń baǵasy 2,92 lıraǵa ósti. Al 1 qyrkúıekte arnaıy tutyný salyǵy óskennen keıin QQS-ty eseptegendegi baǵa taǵy 3,60 lıraǵa kóterildi. Budan keıin dızel otyny 15 qyrkúıekte qaıta qymbattady. Benzın baǵasy da birtindep ósti. Sońǵy ret 12 qyrkúıekte onyń lıtri shamamen 3,20 lıraǵa kóterilgen.
Sala ókilderiniń aıtýynsha, janar-jaǵarmaı baǵasynyń ósýine qalalar men munaı óńdeý kásiporyndarynyń arasyndaǵy qashyqtyq, sondaı-aq tasymaldaý shyǵyndary áser etedi. Álemdik naryqta benzın men dızel otyny qymbattaı berse, bul Túrkııadaǵy baǵanyń ósýine, sonyń saldarynan halyqtyń kúndelikti shyǵynynyń artýyna ákelýi múmkin.
Buǵan deıin 2025 jyly Túrkııa halqynyń qaryzy 4,4 trln lıraǵa jetip, tarıhı shekke shyqqany habarlanǵan bolatyn.
Aqzat Jıenalına
