Túrkııada Jańa jyl merekesinde shabýyl jasaýdy josparlaǵan 115 adam ustaldy

ASTANA. KAZINFORM — Túrkııada quqyq qorǵaý organdary aýqymdy operatsııa júrgizip, «Islam memleketi» terrorıstik uıymyna (Qazaqstanda tyıym salynǵan — red.) qatysy bar degen kúdikke ilingen 115 adamdy ustady. Bul týraly BILD basylymy habarlady.

Eldiń Bas prokýratýrasynyń málimetinshe, ustalǵandar Rojdestvo men Jańa jyl merekesi kezinde, ásirese ıslamdyq emes is-sharalarǵa baǵyttalǵan terrorlyq aktilerdi uıymdastyrýdy josparlaǵan.

Operatsııa Túrkııanyń ártúrli aımaqtarynda 124 mekenjaıda júrgizilgen. Tekserý kezinde arnaıy qyzmet ókilderi qarý-jaraq pen oq-dárilerdi tárkiledi. Sonymen qatar birneshe kúdiktiler izdeýde bolyp, tergeý áreketteri jalǵasyp jatyr.

Túrkııa bıligi qaýiptiń ýaqytynda anyqtalǵanyn jáne bul tıimdi arnaıy qyzmet jumysynyń nátıjesi ekenin atap ótti. Olardyń aıtýynsha, aralasý naqty qaýiptiń aldyn alý úshin qajet bolǵan.

Sondaı-aq Túrkııanyń Sırııamen uzaq shekarasy bar ekeni atap ótildi. Jeltoqsannyń ortasynda DAISh (Qazaqstanda tyıym salynǵan – red.) sodyrlary AQSh áskerı qyzmetkerlerine shabýyl jasap, saldarynan eki sarbaz ben bir beıbit turǵyn qaza tapqan. Túrik bıliginiń pikirinshe, bul el aýmaǵynda terrorlyq áreketter qaýpin kúsheıtedi.

Eske salsaq, buǵan deıin Aýstralııadaǵy Bondı-Bıch jaǵajaıynda terrorlyq akt bolǵan. Qarý qoldanylǵan shabýyl nátıjesinde 15 adam qaza taýyp, bul áreket «Islam memleketi» terrorıstik uıymynyń (Qazaqstanda tyıym salynǵan – red.) yqpalynda jasalǵany belgili boldy. Terrorlyq aktige qatysty adamdar áke men ul bolyp shyqty.