Túrkııada jańa otbasylyq járdemaqy jarııalandy
ASTANA.KAZINFORM - Túrkııa prezıdenti Rejep Taıyp Erdoǵan úkimet otyrysynan keıin rekordtyq eksport kórsetkishin jarııalap, jas otbasylarǵa memlekettik qoldaý kólemin keńeıtti.
Rejep Taıyp Erdoǵan óz sózinde eldiń eksporty sáýir aıynda ótken jylmen salystyrǵanda 22,3%-ǵa ósip, 25,4 mıllıard dollarǵa jetkenin málimdedi. Bıylǵy alǵashqy tórt aıda jalpy eksport 88,63 mıllıard dollar boldy.
Túrkııa prezıdentiniń aıtýynsha, jyldyq eksport alǵash ret 275,8 mıllıard dollarǵa jetti, bul – Túrkııa úshin tarıhı rekord. Barlyq 26 salada ósim tirkeldi. Al eksport geografııasy keńeıip, 166 el men aımaqqa deıin ósti.
Avtokólik ónerkásibindegi eksport kólemi 3,9 mıllıard dollarmen jetekshi eksporttaýshy bolyp qala beredi. Odan keıin hımııa ónerkásibi (3,1 mıllıard dollar), elektrotehnıka jáne elektronıka (1,8 mıllıard dollar) jáne daıyn kıim sektory (1,45 mıllıard dollar). Qorǵanys jáne avıatsııa eksporty 962 mıllıon dollarǵa jetti. Bul qańtar-sáýir aılarymen salystyrǵanda 28%-ǵa ósken.
Onyń sózinde áleýmettik saıasatqa erekshe nazar aýdaryldy. Túrkııa Prezıdenti jas otbasylardy memlekettik qor arqyly qoldaý baǵdarlamasynyń keńeıtiletinin jarııalady. Bul bastama otbasyn qurýdy josparlap otyrǵan azamattarǵa 200 000-nan 250 000 lıraǵa deıin (2 mıllıonnan 2,5 mıllıon teńgege deıin) nesıe beredi.
Buryn balasy bar otbasylarǵa jeńildikter engizilgen bolatyn. Onyń ishinde birinshi bala týǵan kezde tólemdi keıinge qaldyrýǵa ruqsat etilip, nesıe ishinara keshiriletin. Endi Erdoǵan atap ótkendeı, ekinshi bala týǵan kezde qalǵan qaryz tolyǵymen keshiriledi.
Túrkııada halyq sanynyń ósýi baıaýlaǵany habarlandy.
Týý deńgeıin arttyrý úshin memleket basshysy túrik otbasylaryn keminde úsh balaly bolýǵa shaqyrdy. Sonymen qatar 2025 jyly «Otbasy jyly» aıasynda bastalatyn jańa sharalar jastar men demografııany qoldaýǵa baǵyttalǵan.
Buǵan deıin Túrkııa 2026–2035 jyldar aralyǵyn «Otbasy jáne demografııa onjyldyǵy» dep jarııalaǵan bolatyn.
