Túrkııada jalǵan dıplomǵa qatysty aýqymdy qylmystyq shema áshkerelendi
ASTANA. KAZINFORM — Túrkııanyń quqyq qorǵaý organdary jalǵan dıplomdar men júrgizýshi kýálikterin jappaı daıyndaýmen aınalysqan qylmystyq jeliniń qyzmetin áshkereledi, dep habarlaıdy Kazinform agenttiginiń menshikti tilshisi.
Ankara prokýratýrasy bastaǵan tergeý barysynda qaskóılerdiń Bilim mınıstrligi men jekelegen ýnıversıtetterdiń tsıfrlyq júıelerin buzyp, jalǵan elektrondy qoltańbalardy (e-imza) paıdalanǵany anyqtaldy. Olardyń kómegimen qylmyskerler bilim týraly qujattar men júrgizýshi kýálikterin qoldan jasaǵan.
Atalǵan is boıynsha 199 adam tergelip jatyr, olardyń 37-si qamaýǵa alyndy. Erekshe alańdaýshylyq týdyrǵany — qoldan jasalǵan qujattardyń aýqymy: mektep attestattarynan bastap joǵary bilim týraly dıplomdar men júrgizýshi kýálikterine deıin.
Shemanyń uıymdastyrýshylary muqııat áreket etken:
-
Málimetter bazasynan qaıtys bolǵan nemese oqýdan shyǵarylǵan stýdentter týraly aqparatty óshirip, olardyń ornyna tapsyrys berýshilerdiń derekterin engizgen.
-
«Qyzmetterdiń» quny 250 myńnan (shamamen 6 myń AQSh dollary) 2,5 mıllıon túrik lırasyna (shamamen 63 myń dollar) deıin ózgerip otyrǵan. Keıbir jaǵdaıda tólem krıptovalıýta arqyly júrgizilgen.
Qazirgi ýaqytta mynalar anyqtaldy:
-
57 jalǵan ýnıversıtet dıplomy
-
4 jalǵan mektep attestaty
-
108 jalǵan júrgizýshi kýáligi
Tapsyrys berýshiler arasynda eń tanymal mamandyq — «qurylys ınjeneri» bolǵan, bul — eńbek naryǵyndaǵy negizgi baǵyttardyń biri.
Túrkııanyń Joǵary bilim jónindegi keńesi (YÖK) men úkimet ókilderi qylmystyq jeliniń «derlik tolyq joıylǵanyn» málimdedi. Sonymen qatar, olar júzdegen jalǵan akademık týraly qaýesetterdi joqqa shyǵaryp, kúdiktiler arasynda memlekettik ýnıversıtetterdiń oqytýshylary joq ekenin basa aıtty. Tergeýde tek bir avtoınstrýktor men dene shynyqtyrý boıynsha jattyqtyrýshy ǵana atalǵan.
Tergeý jalǵasýda, bılik barlyq kináliler jaýapkershilikke tartylady dep ýáde berip otyr.
Buǵan deıin biz Túrkııada joǵary bilimniń eńbek naryǵymen baılanysy úzilip jatqanyn jazǵan edik. Ýnıversıtet túlekteri jumyssyzdyq pen mamandyqtaryna saı jumysqa ornalasa almaý máselesine tap bolǵan.