Túrkııada zańsyz kóshi-qonǵa qarsy kúres kúsheıdi
ASTANA. KAZINFORM — Túrkııanyń quqyq qorǵaý jáne qaýipsizdik organdary birqatar aýqymdy operatsııalar júrgizip, nátıjesinde ondaǵan zańsyz mıgrant ustaldy.
Elde zańsyz kóshi-qonmen kúres sharalary jalǵasyp jatyr. Edırne jáne Kyrklarelı (soltústik-batys óńirler), sondaı-aq Izmır (batys óńiri) provıntsııalarynda júrgizilgen jedel is-sharalar barysynda quqyq qorǵaý organdary zańsyz júrgen 66 adamdy ustady.
Edırne provıntsııasynda tekseris kezinde shekarany zańsyz kesip ótken 6 sheteldik azamat anyqtaldy. Qajetti rásimderden keıin olar kóshi-qon máseleleri jónindegi provıntsııalyq basqarmaǵa tapsyryldy.
Kórshiles Kyrklarelı provıntsııasynda taǵy 6 zańsyz mıgrant ustalyp, olar ýaqytsha ustaý ortalyǵyna jiberildi.
Eń kóp ustaý jaǵdaıy Izmır provıntsııasynyń Cheshme aýdanynda tirkeldi. 30 maýsymǵa qaraǵan túni jaǵalaý kúzetiniń drony Babıýr shyǵanaǵy mańynda mıgranttar tobyn anyqtady. Keıin jaǵalaý kúzeti men jandarmerııanyń birlesken operatsııasy nátıjesinde 18 adam ustaldy.
Sol kúni tańerteń jaǵalaý baqylaý júıesi Cheshme mańynda úrlemeli qaıyqty baıqap, jaǵalaý kúzeti ony toqtatty. Qaıyqtaǵy 36 zańsyz mıgrant ta ustalyp, tıisti kóshi-qon organdaryna tapsyryldy.
Túrkııa Eýropaǵa ótetin negizgi tranzıttik baǵyttardyń biri bolyp qala beredi. Sońǵy jyldary el bıligi shekara qaýipsizdigin kúsheıtip, zańsyz kóshi-qon men adam tasymalymen aınalysatyn toptarǵa qarsy operatsııalardy jıiletti.
Buǵan deıin bir aı ishinde Túrkııada zańsyz kóshi-qondy uıymdastyrǵan 200-ge jýyq adam jáne 4 myńnan astam zańsyz mıgrant ustalǵany habarlanǵan bolatyn.
Antalııada mıgranttar mingen qaıyq pen kater soqtyǵysyp, 14 adam qaza tapty.
