Túrkııada YouTube pen Twitter-ge tyıym salynady
ASTANA. QazAqparat - Túrkııa bıligi el aýmaǵynda Twitter shaǵyn blogtary men YouTube vıdeohostıngin oqshaýlaý týraly sheshimge keldi. Buǵan prokýratýra nusqaý bergen eken.
Hurriyet Daily News habarlaǵandaı, buǵan atalǵan jelilerde ótken aptada sodyrlar tutqynǵa alǵan túrik prokýrorynyń sýretteriniń ornalastyrylýy túrtki bolǵan. Jergilikti provaıderler jaqyn arada Twitter men YouTube-ke shyǵý múmkindigin joıady dep kútilip otyr.
Bastapqyda Túrkııa bıligi Facebook áleýmettik jelisine de tyıym salmaq bolǵan. Alaıda áleýmettik jeli ókilderi dereý daýly sýretterdi joıyp, bılik bul oıynan bas tartqan edi. Ony jarııalaǵany úshin elde barlyǵy 150 saıt oqshaýlandy.
Stambul prokýratýrasynyń qyzmetkeri Selım Kırazdy 31 naýryzda sot zalynda «Revolıýtsııalyq halyq-azattyq partııasy» tobynyń sodyrlary tutqynǵa alǵan. Túriktiń kúsh qurylymdary prokýrordy bosata aldy. Alaıda ol alǵan jaraqattarynyń saldarynan qaza tapty.
