Túrkııada ıAsaýı men Evran týraly jańa kitaptyń tusaýkeseri ótti
ASTANA. KAZINFORM – Túrkııa astanasynda «Túrkistannan Anadolyǵa deıingi órkenıet kópiri: Ahılik» atty kitap pen «Ahmet ıAsaýıden Ahı Evranǵa deıin» derekti fılminiń tanystyrylymy ótti. Bul týraly Kazinform agenttiginiń Ankaradaǵy menshikti tilshisi habarlaıdy.
Túrkııanyń memlekettik qurylymdary men túrki álemi uıymdary ókilderiniń qatysýymen ótken is-shara «Ahılik aptalyǵy» aıasynda uıymdastyryldy. Jıynda Túrkistan men Anadoly arasyndaǵy tarıhı sabaqtastyqqa, sondaı-aq qazirgi Qazaqstan jerindegi ejelgi Túrkistanda týǵan Qoja Ahmet ıAsaýıdiń rýhanı murasyna aıryqsha nazar aýdaryldy.
Kitaptyń alǵysózin Túrkııa Prezıdenti Rejep Taııp Erdoǵan jazǵan.
Onyń paıymynsha, Ahılik – qolónershiler men saýdagerlerdi ǵana uıystyrǵan dástúr emes, túrki áleminiń ortaq mádenı murasynan nár alǵan, adamgershilik qaǵıdalar men qoǵamdyq qundylyqtardy toǵystyrǵan tutas rýhanı júıe.
Jıynda sóz alǵan Túrkııanyń bıliktegi Ádilet jáne damý partııasy (AK Parti) tóraǵasynyń orynbasary, Túrki memleketterimen baılanys jónindegi tóraǵasy Kýrshad Zorlý Ahmet ıAsaýı men Ahı Evrannyń Túrkistan men Anadoly arasyndaǵy mádenı baılanysty nyǵaıtýdaǵy erekshe rólin atap ótti. Ol ıAsaýıdiń eńbekke, adamı qadir-qasıetke jáne birlikke negizdelgen ıdeıalary ahılık dástúrinde jalǵasyp kele jatqanyn málimdedi.
Óz kezeginde Zorlý Túrkııanyń Ahılik dástúrin ıÝNESKO-nyń Adamzattyń materıaldyq emes mádenı murasynyń reprezentatıvti tizimine engizýge bastamashy bolatynyn jetkizdi. Bul baǵyttaǵy jumystardy túrki álemi memleketterimen birlesip atqarý kózdelip otyr. Aldaǵy ýaqytta Ankara Ahılik dástúrin ıÝNESKO-nyń Búkilálemdik muralar tizimine de engizýge kúsh salmaq.
Jıynda túrki memleketteri arasyndaǵy yntymaqtastyqty odan ári nyǵaıtý máselesi de sóz boldy. Kúrshad Zorlý Túrki memleketteri uıymyna múshe elderdiń elektrondy saýdasyn damytýǵa jol ashatyn tsıfrlyq platforma ázirlenip jatqanyn aıtty.
Saıasatkerdiń aıtýynsha, túrki álemi elderiniń jıyntyq jalpy ishki ónimi shamamen $2,2 trln-dy quraıdy. Alaıda memleketter arasyndaǵy ózara saýda kólemi ázirge salystyrmaly túrde tómen deńgeıde qalyp otyr.
Buǵan deıin Túrkııa mektepterinde túrki álemine arnalǵan jańa kýrs engizilgeni habarlanǵan bolatyn.
Aqzat Jıenalına
