Túrkııada vıza rásimdeýge qatysty alaıaqtyq áshkerelenip, 37 adam ustaldy
ASTANA.KAZINFORM — Ystambulda vıza rásimdeýge qatysty alaıaqtyq isin tergeý barysynda 37 adam qamaýǵa alyndy, dep habarlaıdy Report.
Túrkııa Bas prokýratýrasynyń úılestirýimen júrgizilgen tergeý barysynda ózin vıza boıynsha keńesshi retinde tanystyrǵan keıbir adamdar men kompanııalardyń arnaıy «bottardy» paıdalanyp, vıza rásimdep berý úshin azamattardan aqsha alǵany anyqtaldy.
Tergeý kezinde ýáde etilgen qyzmet kórsetilmegen jaǵdaıda ótinish berýshilerge aqshasy qaıtarylmaǵany, sondaı-aq olardyń jeke derekteri avtomattandyrylǵan baǵdarlamalarǵa berilgeni anyqtaldy.
Sonymen qatar kúdiktilerdiń bul qyzmetten túsken tabystardy túrli adamdar men kompanııalardyń bank shottary arqyly aýdaryp otyrǵany belgili boldy.
Sotqa jetkizilgen 41 kúdiktiniń 37-si qamaýǵa alyndy, al tórteýi sot baqylaýymen bosatyldy.
Eske salaıyq, AQSh-ta jalǵan neke shemasymen grın-karta taratqan 11 adam jaýapqa tartyldy.
