Túrkııada Van Gog kartınasy zańsyz satylǵaly turǵan jerinen tárkilendi
ASTANA. QazAqparat - Túrkııanyń soltústigindegi Tokat provıntsııasynyń polıtsııasy zańsyz saýdaǵa túskeli turǵan kartınany tárkiledi. Aldyn ala boljam boıynsha ol belgili gollandııalyq sýretshi Vınsent Van Gogtyń týyndysy bolýy múmkin.
Milliyet gazeti jazǵandaı, polıtsııa ǵalamtordan Van Gog kartınasynyń satylatyny jóninde habarlandyrýdy kórgen. Olar satyp alýshy retinde habarlandyrýdy jarııalaǵan adammen baılanysyp, kelissóz júrgizgen. Nátıjesinde satýshy ustalyp, kartına tárkilendi.
Maıly boıaýmen salynǵan sýrettiń artqy jaǵynda "Vınsent Van Gog, Gaaga, 1882", " Dalema mýzeıi" degen jazýlar bolǵan. Óner týyndysy Tokattaǵy Gazıosmanpash ýnıversıtetine jóneltildi. Onda jasalǵan aldyn ala saraptamalar bunyń Van Gogtyń sýretteriniń biri bolý múmkin ekendigin kórsetti. Bul kartınanyń qaryndashpen salynǵan nobaıy Amsterdamdaǵy Van Gog murajaıynda saqtalǵan.
Van Gogtyń eń qymbat eńbegi - "Doktor Gasheniń portreti". Ol 1990 jyldyń mamyrynda Christie"s aýktsıon úıiniń saýdasynda 82,5 mıllıon dollarǵa satylǵan.
