Túrkııada vagon relsten shyǵyp ketti: 10 adam qaza bolyp, 73-i jaraqattandy
ASTANA. QazAqparat - Túrkııanyń Tekırdag provıntsııasynda jolaýshylar poıyzynyń vagony relsten shyǵyp ketip, aýdaryldy, dep habarlaıdy QazAqparat Anadolý agenttigine silteme jasap.
Oqıǵa Tekırdag provıntsııasynyń Chorlý aýdanynda boldy. Poıyz Kapıkýle-Ystanbul baǵytyna bet alyp kele jatqan.
Túrkııa densaýlyq saqtaý mınıstrliginiń ókili Eıýp Gmıýshtiń sózinshe, aldyn ala málimet boıynsha apat saldarynan 10 adam qaza boldy. Taǵy 73-i jaraqattar aldy.
Eldiń Kólik mınıstrliginiń málimetinshe, oqıǵa jaýyn-shashynnan topyraqtyń jumsarýynan bolǵan.
Kýá bolǵandardyń aıtýynsha, ajal qushqandar men zardap shekkender óte kóp.
«Zardap shekkender kóp. Oqıǵa ornyna jerge jetý qıyn bolǵandyqtan arnaıy tehnıka jumyldyryldy. Jaraqattanǵandardyń deni evakýatsııalandy. Apat ótkinshi jańbyrlar saldarynan bolǵany týraly aqparat bar. Taıaý ýaqytta mınıstrlik buǵan qatysty málimdeme taratatyn bolady», - dedi Tekırdag gýbernatory.
Túrkııa úkimeti de Tekırdagtaǵy temirjol apatynan kóptegen adamdar mert bolyp, zardap shekkenin rastady.
Oqıǵa jóninde Túrkııa prezıdenti Rejep Taııp Erdoǵan men premer-mınıstr Bınalı Iyldyrym habardar etildi.
Jaraqattanǵandardy evakýatsııalaý úshin áskerı tikushaqtar attandyryldy.
